Qyrǵyzstan men Pákistan syrtqy ister mınıstrleri Astanada kezdesedi
ASTANA. KAZINFORM – 21 mamyrda Astanada Qyrǵyzstan men Pákistan syrtqy ister mınıstrleri kezdesedi, dep habarlaıdy Qyrǵyz Respýblıkasy Syrtqy ister mınıstrliginiń baspasóz qyzmeti.
«2024 jylǵy 19 mamyrda Qyrǵyz Respýblıkasy Syrtqy ister mınıstrliginde Qyrǵyz Respýblıkasy Syrtqy ister mınıstriniń orynbasary Avazbek Atahanov pen Pákistan Islam Respýblıkasynyń Qyrǵyz Respýblıkasyndaǵy Elshisi Hasan Álı Zaıgamnyń kezdesýi ótti. Elshi qyrǵyz tarapyna aǵymdaǵy jyldyń 18 mamyrynda Bishkekte sheteldik stýdentterdiń, sonyń ishinde Pákistan azamattarynyń qatysýymen oqıǵa týraly aqparat alýǵa kórsetken kómegi úshin alǵysyn bildirdi. A.Atahanov oqıǵanyń rettelgenin jáne jaǵdaı Qyrǵyz Respýblıkasynyń quqyq qorǵaý organdarynyń tolyq baqylaýynda ekenin, barlyq qatysy barlarǵa qatysty tergeý júrip jatqanyn atap ótti», - dep habarlady vedomstvo.
Taraptar Qyrǵyz Respýblıkasynyń Syrtqy ister mınıstri Jeenbek Qulýbaev pen Pákistan premer-mınıstriniń orynbasary – Syrtqy ister mınıstri Mohammad Ishak Dardyń kezdesýin 21 mamyrda Astanada ótetin ShYU Syrtqy ister mınıstrleri keńesi aıasynda uıymdastyrýǵa kelisti.
18 mamyrda Bishkekte sheteldikter qatysqan jappaı tóbeles boldy. Ol 13 mamyrda jataqhana qonaqtary arasyndaǵy tóbelesten bastalǵan.
Keıin Qyrǵyzstan Ulttyq qaýipsizdik memlekettik komıtetiniń tóraǵasy Kamchybek Tashıev Bishkektegi túngi oqıǵaǵa qatysty túsinikteme berdi. Oqıǵa saldarynan 29 adam medıtsınalyq kómekke júginse, onyń 15-i el astanasynyń emdeý mekemelerine jetkizildi.
Qyrǵyz Respýblıkasynyń Mınıstrler kabıneti Bishkektegi túngi oqıǵadan keıin málimdeme jasap, onda ultaralyq zorlyq-zombylyq pen tártipsizdik týdyrý áreketterin qatań aıyptady.
Pákistan premer-mınıstri Shahbaz Sharıf Bishkekte sheteldik azamattarǵa qatysty oqıǵaǵa alańdaýshylyq bildirdi.
Qazaqstan Respýblıkasynyń Ulttyq qaýipsizdik komıteti Qyrǵyzstannan Qazaqstanǵa ketýdi josparlap otyrǵan sheteldik stýdentter týraly aqparatty joqqa shyǵardy.
