Qyrǵyzstan men Ózbekstan sý máseleleri boıynsha yntymaqtastyqty nyǵaıtty
BІShKEK. KAZINFORM – Manasta qyrǵyz-ózbek birlesken sý sharýashylyǵy komıssııasynyń jetinshi otyrysy ótti, dep habarlaıdy Kazinform menshikti tilshisi.
Qyrǵyzstan Respýblıkasy Sý resýrstary, aýyl sharýashylyǵy jáne óńdeý ónerkásibi mınıstrliginiń málimetinshe, taraptar ekijaqty ózara yntymaqtastyqtyń ózekti máselelerin, sonyń ishinde sý resýrstaryn tıimdi paıdalaný, klımattyń ózgerýi jaǵdaıynda sý jáne energetıkalyq qaýipsizdikti qamtamasyz etý jáne aımaqtyq damý perspektıvalaryn talqylady.
Qyrǵyzstan Respýblıkasy Mınıstrler kabıneti tóraǵasynyń orynbasary jáne Sý resýrstary, aýyl sharýashylyǵy jáne óńdeý ónerkásibi mınıstri Baqyt Torobaev sý resýrstaryn yntymaqtastyqtyń basym baǵyty retinde belgiledi.
- Aımaqtaǵy negizgi sý joldarynyń bastaýynda ornalasqan Qyrǵyzstan Ortalyq Azııanyń azyq-túlik jáne ekologııalyq qaýipsizdigine úles qosa otyryp, tómengi aǵys elderin qajetti sýmen qamtamasyz etý boıynsha mindettemelerin únemi oryndap keledi. Álemdik klımattyń ózgerýine qaramastan, bizdiń elimiz sýdy daý máselesi retinde emes, ózara túsinistik, dostyq jáne turaqty damýdyń negizi retinde qarastyrady, - dep atap ótti ol.
Yntymaqtastyqtyń tıimdiligin arttyrý maqsatynda qyrǵyz tarapy birqatar jańa bastamalardy usyndy, sonyń ishinde shekaralas aımaqtarda tamshylatyp jáne avtomattandyrylǵan sýarýdy engizý, ormandardy qalpyna keltirý jáne shóleıttenýge qarsy kúres júrgizý úshin qyrǵyz-ózbek shekarasy boıynda «Dostyqtyń jasyl beldeýin» qurý, sondaı-aq sý jáne energetıka salalaryndaǵy ýákiletti memlekettik organdar arasyndaǵy yntymaqtastyqty odan ári damytý.
Sondaı-aq, Qambarata SES-1 jáne «Qytaı-Qyrǵyzstan-Ózbekstan temirjolyn salýdy qosa alǵanda, birlesken jobalardy júzege asyrýdyń mańyzdylyǵy atap ótildi. Bul jobalar búkil aımaqtyń energetıkalyq áleýeti men kólik baılanysyn nyǵaıtý úshin aıtarlyqtaı múmkindikter ashyp otyr.
Qazan aıynda Dýshanbede qyrǵyz-tájik sý sharýashylyǵy komıssııasynyń birinshi otyrysy ótti.