Qyrǵyzstan men Ózbekstan shekarasynda jasyryn týnnel tabyldy
ASTANA. KAZINFORM – Qyrǵyzstannyń Jalalabad oblysynda Ózbekstanǵa aparatyn taǵy bir týnnel tabyldy. Qyrǵyzstanda turatyn kúdikti sol arqyly adamdar men taýarlardy zańsyz ótkizip júrgen. Shekarany zańsyz kesip ótti degen kúdikpen 40 jastaǵy Ózbekstan azamaty qamaýǵa alyndy, dep habarlaıdy Kazinform Qyrǵyzstan ishki ister mınıstrliginiń baspasóz qyzmetine silteme jasap.
Bul týnnel arqyly Ózbekstan aýmaǵyna adamdar men kontrabandalyq taýarlar zańsyz tasymaldanǵany atap ótilgen. Osy jyldyń 5 sáýirinde oblystyq ІІB qyzmetkerleri Qyrǵyzstan shekarasyn zańsyz kesip ótken Ózbekstan azamatyn qolǵa túsirgen. Onyń kórshi elge osy qupııa týnnel arqyly ótkeni anyqtalǵan.
Sondaı-aq, 12 sáýirge qaraǵan túni Nooken aýdanynda aqshaǵa qyrǵyz-ózbek shekarasyn zańsyz kesip ótýdi uıymdastyrdy degen kúdikpen jergilikti halyqtyń ókili de qamaýǵa alyndy.
«Kúdiktiden arnaıy tańbalanǵan valıýta men túnde kóretin dúrbi tárkilendi. Sondaı-aq onyń úıinde quny 30 myń dollarǵa jýyq 87 qorap esirtki saqtaǵany anyqtaldy», – delingen habarlamada.
