Qyrǵyzstan men Ózbekstan shekarasynda elektrondy kezek júıesi engizildi
ASTANA. KAZINFORM - Qyrǵyz-ózbek shekarasyndaǵy «Dostyq» ótkizý beketinde elektrondy kezek júıesi iske qosyldy, dep habarlaıdy Kazinform agenttiginiń menshikti tilshisi.
Qyrǵyzstan Respýblıkasynyń Ekonomıka jáne saýda mınıstrliginiń habarlaýynsha, qabyldanǵan sharalar shekaradan ótý ýaqyty men shyǵyndaryn qysqartýǵa, ákimshilik kedergilerdi barynsha azaıtýǵa jáne taýarlardyń erkin qozǵalysy úshin jaǵdaı jasaýǵa baǵyttalǵan. Bul taýar aǵynynyń ósýine yqpal etedi jáne ekonomıkanyń damýyna septigin tıgizedi.
Vedomstvo vıtse-mınıstri Eskendir Asylqulovtyń aıtýynsha, kólik aǵynyn basqarýdyń elektrondy júıesi protsedýralardy jeńildetedi. Bıznes pen tasymaldaýshylardyń shyǵyndaryn azaıtyp, saýda protsesteriniń ashyqtyǵy men tıimdiligin arttyrady.
- Bul onyń básekege qabilettiligin arttyrýǵa baǵyttalǵan ekonomıkanyń tsıfrlyq transformatsııasynyń keńirek strategııasynyń bir bóligi, - dep atap ótti sheneýnik.
Vedomstvo byltyr qarasha aıynda «Qyzyl-Qııa avtojol» baqylaý-ótkizý beketinde júıe pılottyq rejımde iske qosylyp, joǵary tıimdilik kórsetkenin habarlaıdy. Júk kóliginiń keptelisi joıylyp, aldyn ala tirkeý, kútý ornynda bólý jáne kezek tártibin qatań saqtaýdyń arqasynda rettelgen qozǵalys qamtamasyz etildi. Sondaı-aq irgeles joldardaǵy júktemeni azaıtýǵa jáne tasymaldaýshylardyń tártip deńgeıin kóterýge múmkindik týdy.
Qazaqstan men Qyrǵyzstan shekarasyndaǵy «Qarqyra-avtojol» ótkizý beketiniń táýlik boıy jumys isteý rejımine kóshkeni týraly buǵan deıin jazǵan bolatynbyz.