Qyrǵyzstan men Ózbekstan basshylary birlesken úsh iri jobany iske qosty
TAShKENT. KAZINFORM – Qyrǵyzstan prezıdentiniń Ózbekstanǵa memlekettik sapary barysynda Sadyr Japarov pen Shavkat Mırzıeev birlesken qyrǵyz-ózbek jobalaryn iske qosty, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ózbekstan basshysynyń baspasóz qyzmetinen málim etkendeı, Shý oblysynda kommertsııalyq tehnıka men jeńil kólik qurastyratyn «Tulpar Motors» zaýyty ashyldy. 4,7 gektar aýmaqty alyp jatqan kásiporynda 500 adam qyzmet etedi.
Onda «Cobalt», «Onix», «Tracker» markaly temirtulparlarmen qatar, «SamAuto» sııaqty júk kóligi qurastyrylady.
Sonymen qatar Qara-Balta qalasynda mata jáne trıkotaj buıymdaryn jasaıtyn fabrıkanyń jumysy bastaldy. Kásiporyn jylyna 17 myń tonna toqylǵan mata men 7 mln dana trıkotaj shyǵarýǵa qaýqarly.
Buǵan qosa, Ózbekstannyń Ferǵana jáne Namanǵan oblystarynda árqaısysynyń qýaty 200 MVt bolatyn eki kún elektr stantsııanyń qurylysy bastaldy. Onda óndiriletin elektr energııasynyń bir bóligi Qyrǵyzstanǵa baǵyttalmaq.
Eske salaıyq, bul kúnderi Qyrǵyzstan prezıdentiniń Ózbekstanǵa memlekettik sapary ótip jatyr.
