Qyrǵyzstan men Ózbekstan aýmaq almasýdyń kelesi qadamyn kelisti
ASTANA.KAZINFORM - Batken oblysynyń Qadamjaı qalasynda jer almasýǵa qatysty uıymdastyrýshylyq jáne tehnıkalyq máselelerdi sheshý boıynsha Qyrǵyzstan men Ózbekstan arasyndaǵy birlesken jumys komıssııasynyń otyrysy ótti, dep habarlaıdy Kazinform agenttiginiń Bishkektegi tilshisi.
Qyrǵyzstan Respýblıkasynyń Eńbek, áleýmettik qorǵaý jáne kóshi-qon mınıstrliginiń málimetinshe, taraptar aýmaqtyq almasý protsesinde qol jetkizilgen kelisimderdiń is júzinde júzege asyrylýyn talqylap, birlesken jumystyń kelesi tártibi týraly kelisti.
Qyrǵyzstan boıynsha birlesken komıssııanyń teń tóraǵasy bolyp Eńbek, áleýmettik qorǵaý jáne kóshi-qon mınıstriniń birinshi orynbasary K.Dosmatov, al Ózbekstan boıynsha Іshki ister mınıstriniń birinshi orynbasary B.Kýdrathodjaev taǵaıyndaldy.
Kezdesýden keıin eki eldiń tıisti mınıstrlikteri, agenttikteri jáne jergilikti bılik organdary ókilderinen turatyn birlesken jumys tobynyń quramy bekitildi.
Top almasý aýmaǵy turǵyndaryn qonystandyrý, azamattyq alý, memlekettik múlikti berý men qabyldaý, azamattardyń menshik quqyqtaryn resimdeý, jerdi paıdalaný jáne áleýmettik qamsyzdandyrý, sondaı-aq bilim berý protsesiniń úzdiksizdigine qatysty praktıkalyq máselelerdi qarastyrady.
Buǵan deıin biz Ózbekstan eki aýylyn Qyrǵyzstanǵa berý protsesin bastap ketkenin habarlaǵan edik.
