Qyrǵyzstan men Ońtústik Koreıa birlesken damý qoryn qurýy múmkin
ASTANA. KAZINFORM — Jogorký Kenesh tóraǵasy Marlen Mamatalıev Ońtústik Koreıa Ulttyq assambleıasy tóraǵasynyń orynbasary, «Koreıa — Qyrǵyzstan» parlamenttik dostyq tobynyń jetekshisi Pak Dok Hymmen kezdesti, dep habarlaıdy Kabar.
Taraptar qyrǵyz-koreı yntymaqtastyǵyn damytý jáne parlamentaralyq baılanystardy nyǵaıtý máselelerin talqylady.
Budan bólek, kezdesý barysynda saýda-ekonomıkalyq yntymaqtastyq máseleleri de qaralyp, taraptar bul saladaǵy áleýetti barynsha tıimdi paıdalanýdyń mańyzyn atap ótti.
Sondaı-aq Mamatalıev «Ortalyq Azııa — Koreıa Respýblıkasy» formatyndaǵy sammıtterdiń óńirlik jáne ekijaqty yntymaqtastyqty jańa deńgeıge kóterýde mańyzdy alańǵa aınalǵanyn aıtty.
Ol eki el arasyndaǵy kelisimderdi iske asyrýda parlamentterdiń róli zor ekenin, sońǵy jyldary zań shyǵarýshy organdar arasyndaǵy baılanys aıtarlyqtaı jandanǵanyn atap ótti.
— Dostyq toptarynyń jumysy erekshe nátıjeli bolyp, kóptegen birlesken jobalar júzege asyryldy. Mundaı qyzmet parlamentaralyq baılanystardy nyǵaıtyp qana qoımaı, memleketterimiz arasyndaǵy yntymaqtastyqtyń damýyna da eleýli úles qosady, — dedi Mamatalıev.
Ol ekonomıkalyq yntymaqtastyqty keńeıtý úshin Qyrǵyz-Koreı damý qoryn qurýdy jáne bilim berý salasynda arnaıy kvotalar bólýdi usyndy.
Óz kezeginde Pak Dok Hym bul sapar parlamentaralyq baılanystardy nyǵaıtyp, ekijaqty yntymaqtastyqty odan ári damytýǵa serpin beretinine senim bildirdi. Ol Ońtústik Koreıanyń Qyrǵyzstanmen barlyq baǵyt boıynsha yntymaqtastyqty keńeıtýge múddeli ekenin erekshe atap ótti.
— Bizde múmkindik kóp. Olardy tolyq paıdalana otyryp, qyrǵyz-koreı qatynastaryn jańa deńgeıge kótere alamyz. Bul — bizdiń basty maqsatymyz, — dedi vıtse-spıker.
Koreı delegatsııasynyń músheleri de bilim berý, ınnovatsııalyq tehnologııalar jáne energetıka salalaryndaǵy birlesken jumystyń mańyzyn atap ótip, óz usynystaryn aıtty.
Buǵan deıin Qyrǵyzstanda áskerge elektrondy shaqyrtý men tsıfrlyq kýálik engiziletinin jazǵan edik.
