Qyrǵyzstan men Qytaı Máńgilik tatý kórshilik, dostyq jáne yntymaqtastyq týraly shartqa qol qoıdy
BІShKEK. KAZINFORM – 31 tamyzda Bishkekte Qyrǵyzstan Respýblıkasynyń prezıdenti Sadyr Japarov pen Qyrǵyzstanǵa memlekettik saparmen barǵan QHR tóraǵasy Sı Tszınpın kelissóz júrgizdi, dep habarlaıdy Kazinform agenttiginiń Bishkektegi menshikti tilshisi.
Sı Tszınpınniń memlekettik sapary barysynda kólik jáne logıstıka, ınvestıtsııa, gýmanıtarlyq ister jáne basqa da salalardaǵy qyrǵyz-qytaı yntymaqtastyǵyn odan ári nyǵaıtýǵa baǵyttalǵan ekijaqty qujattarǵa qol qoıý jáne almasý rásimi ótti.
Kelissózdiń negizgi nátıjesi Qyrǵyz Respýblıkasy men Qytaı Halyq Respýblıkasy arasyndaǵy Máńgilik tatý kórshilik, dostyq jáne yntymaqtastyq týraly shartqa, sondaı-aq eki eldiń Jańa dáýirdegi jan-jaqty strategııalyq seriktestikti sapaly damytý týraly birlesken deklaratsııaǵa qol qoıý boldy.
- Taraptar QHR tóraǵasy Sı Tszınpınniń memlekettik sapary qyrǵyz-qytaılyq jan-jaqty strategııalyq seriktestikke jańa jáne qýatty serpin beretinine jáne ekijaqty yntymaqtastyqtyń iri jobalarǵa, turaqty damýǵa jáne eki el halyqtarynyń ál-aýqatyn jaqsartýǵa baǵyttalǵan jańa praktıkalyq kezeńge ótýin belgileıtinine senim bildirdi, - dep habarlady Qyrǵyzstan Respýblıkasy prezıdentiniń baspasóz qyzmeti.
Aıta keteıik, 1 qyrkúıekte Qyrǵyzstan astanasynda Shanhaı yntymaqtastyq uıymyna múshe memleketter basshylary keńesiniń kezekti otyrysy ótedi.
Bir kún buryn Qytaı tóraǵasy Sı Tszınpın Qyrǵyzstanǵa memlekettik saparmen bardy.
Búgin jańa «Bishkek Arena» stadıonynda VI Dúnıejúzilik kóshpendiler oıyndarynyń saltanatty ashylý rásimi ótedi.
Oıyndardyń negizgi mádenı jáne ǵylymı baǵdarlamasy 2-6 qyrkúıek aralyǵynda Sholpan-Ata men Ystyqkól oblysyndaǵy Qyrchyn shatqalynda jalǵasady.
Osyǵan deıin Toqaev Sadyr Japarovty Qyrǵyzstannyń Táýelsizdik kúnimen quttyqtaǵanyn jazǵanbyz.
