Qyrǵyzstan men Qazaqstan arasynda saıası qaıshylyqtar joq – Jeenbek Qulýbaev
BІShKEK. KAZINFORM – Qyrǵyz Respýblıkasynyń syrtqy ister mınıstri Jeenbek Qulýbaev QR Syrtqy ister mınıstri Murat Nurtileýmen kezdesý barysynda Qyrǵyzstan men Qazaqstan arasynda saıası qaıshylyqtar joq ekenin málimdedi. Bul týraly «Kabar» agenttigi habarlady.
«Barlyq ózekti másele mınıstrler, premer-mınıstrler jáne memleket basshylary deńgeıinde kelissózder men kezdesýler arqyly sheshiledi», — dedi ol.
Sondaı-aq Jeenbek Kulýbaev ǵasyrlar boıy synnan ótken qyrǵyz-qazaq dostyǵy ortaq maqsatqa jetýge, halyqtardyń ál-aýqatyn arttyrýǵa septigin tıgizetinin atap ótti.
«Ejelden eki eldi týystyq qatynastar baılanystyryp keledi. Sondyqtan biz ata-babamyzdan kele jatqan qundylyqtardy saqtap, arttyrýymyz kerek. Táýelsizdik jyldarynda ekijaqty qarym-qatynastyń berik negizin qaladyq jáne ekijaqty irgeli qujattarǵa qol qoıdyq. Búginde yntymaqtastyqtyń joǵary deńgeıine qol jetip otyr», — dedi ol.
Ol memleket basshylarynyń 2022 jylǵy resmı kelissózderiniń qorytyndysy boıynsha qyrǵyz-qazaq dıplomatııalyq qarym-qatynastarynyń damý nátıjelerine joǵary baǵa berilgenin eske saldy. Sonymen qatar taraptar dostyq áriptestikti odan ári damytyp, saıası, saýda-ekonomıkalyq, sý-energetıkalyq jáne gýmanıtarlyq salalar boıynsha oń nátıjelerge qol jetkizýge ýaǵdalasty.
Kezdesý sońynda Jeenbek Kulýbaev bul kezdesý eki el men halyqtardyń múddelerin tolyq kórsetetin yntymaqtastyqtyń aldaǵy qadamdary men baǵytyn anyqtaýǵa múmkindik beretinine senim bildirdi.
Kelissózder qorytyndysy boıynsha, eki eldiń syrtqy ister mınıstrleri 2024-2026 jyldarǵa arnalǵan áriptestik baǵdarlamasyna qol qoıdy.
Esterińizge salsaq, QR SІM basshysy Murat Nurtileý Qyrǵyzstanǵa Jeenbek Qulýbaevtyń shaqyrýymen resmı saparmen barǵan bolatyn.
Oralhan QOJANOV
