Qyrǵyzstan 12 jyldyq bilim berýge kóshýdi qarastyratyn standartty bekitti

BІShKEK. KAZINFORM - Qyrǵyzstan úkimeti mektepterde 12 jyldyq bilim berýge kóshýdi qarastyratyn jalpy bilim berýdiń jańa memlekettik bilim standartyn bekitti, dep habarlaıdy Fergana.agensy.

Bul qadam ulttyq bilim berý júıesin halyqaralyq keńistikke biriktirýge jáne stýdentterdi daıarlaý sapasyn arttyrýǵa baǵyttalǵan, dep túsindirdi úkimet.

Jańa standart boıynsha oqytý úsh deńgeıge bólinedi:

- bastaýysh jalpy bilim berý – 1-6 synyptar;

- negizgi jalpy bilim berý – 7-9 synyptar;

- orta jalpy bilim – 10-12 synyptar.

Negizgi ózgerister oqýshylardy baǵalaýdyń jańartylǵan tásilderi bolady. 1-3-synyptarda baǵalaýsyz júıe jumys isteıdi, al 4-synyptan bastap oqý jetistikterin baqylaý úshin baldyq júıe engiziledi. 7-12 synyptar aralyǵynda oqýshylardyń ózin-ózi baǵalaýy men motıvatsııasyn yntalandyrýǵa baǵyttalǵan krıterıaldy baǵalaý qoldanylady. Túlekterdiń qorytyndy attestattaýynda beıindik pánder eskerilip, kásiptik oqý oryndaryna túsýge yqpal etedi.

Jańa standart sonymen qatar Qyrǵyzstannyń barlyq mektepteri úshin bazalyq oqý josparyn, pándik standarttardy jáne oqý-ádistemelik keshenderin ázirleýdi qarastyrady. Bul birtutas bilim berý keńistigin, baǵdarlamalardyń sabaqtastyǵyn jáne bilim berý sapasyn basqarýdy qamtamasyz etedi dep kútilýde.

Qyrǵyzstanda mektepterde 12 jyldyq bilim berýge kóshý 2025 jyldyń qyrkúıeginde bastalady. Alty jastaǵy balalar birinshi synypqa barady, al jeti jasar balalar tikeleı ekinshi synypqa qabyldanady. Úshinshi synypty bitirgen oqýshylar besinshi synypqa, al altynshy synypty bitirgender segizinshi synypqa sekiredi.

12 jyldyq mektepti bitirgeni týraly alǵashqy attestattar 2027/2028 oqý jylynyń sońynda beriledi. Tolyq 12 jyldyq mektepti 2036/2037 oqý jylynda 2019 jyly týǵan balalar bitiredi.

Qyrǵyzstannyń bilim mınıstri Dogdýrkúl Kendırbaevanyń aıtýynsha, ýnıversıtet baǵdarlamasynyń bir bóligi mektepterde oqytylatyndyqtan, bakalavrıatta oqý merzimi tórt jyldan úsh jylǵa deıin qysqarady: joǵary synyptarda matematıka, fızıka, hımııa jáne til pánderin tereńdetip oqytýmen beıindik bilim engiziledi.

Al, otbasylyq bilim berý engizý týraly Úkimet qaýlysynyń jobasy qoǵamdyq talqylaý úshin biryńǵaı portalda jarııalandy. Osylaısha, jalpy bilim berý uıymdaryna barýǵa fızıkalyq múmkindikteri joq el turǵyndary úshin memlekettik úlgidegi qujattardy berý arqyly mekteptegi bilimniń qoljetimdiligin keńeıtý usynylady.

Osyǵan deıin habarlaǵanymyzdaı, Qyrǵyzstan Ortalyq Azııa elderine vızasyz rejım engizýdi usyndy.