Qyrǵyzstan mektepte aqsha jınaǵandarǵa aıyppul salýdy usyndy

BІShKEK. KAZINFORM — Qyrǵyz Respýblıkasy Jogorký Keneshiniń quqyqtyq tártip, qylmysqa jáne sybaılas jemqorlyqqa qarsy is-qımyl komıteti Qyrǵyz Respýblıkasynyń Bilim týraly zańyna, Quqyqbuzýshylyq týraly kodeksine mektepte zańsyz aqsha jınaǵany úshin aıyppul salýdy qarastyratyn túzetýlerdi birinshi oqylymda qabyldady.

Zań jobasynyń bastamashysy JK depýtaty Mırgúl Temirbaevanyń atap ótýinshe, Qyrǵyz Respýblıkasy Prezıdentiniń jarlyǵymen salynǵan tyıymǵa qaramastan mektepterde áli de zańsyz aqsha jınaý jalǵasyp jatyr.

Osyǵan oraı, mektepte tegin bilim alý quqyǵyn qamtamasyz etý, zańsyz aqsha jınaýǵa jol bermeý, onyń ishinde mektepterde memlekettik qor qurý arqyly osy zań jobasy ázirlendi. 

Aqshany zańsyz óndirý faktileri anyqtalǵan jaǵdaıda Quqyq buzýshylyq týraly kodeksine sáıkes jaýapkershilikke tartý usynylady.

Túzetýler Quqyq buzýshylyq týraly kodekske «Memlekettik bilim berý uıymdarynda aqshalaı qarajatty zańsyz óndirý» 74-1-babyn engizýdi usynady, ony buzǵany úshin jeke tulǵalarǵa 200 eseptik kórsetkish (20 myń som nemese 113 myń teńgeden astam) aıyppul salynady.

Eger dál osyndaı buzýshylyq mektepterde memlekettik qor qurý arqyly oryn alsa, onda bul jeke tulǵalarǵa 400 eseptik kórsetkish (40 myń som nemese 227 myń teńgeden astam) jáne zańdy tulǵalar úshin 600 eseptik kórsetkish (60 myń som nemese 340 myńnan astam teńge) mólsherinde aıyppul salýǵa ákep soǵady. 

Budan buryn habarlanǵandaı, Qyrǵyzstanda balalaryn qorǵanshy men qamqorshysynsyz qaldyryp eńbek mıgratsııasyna ketken ata-analarǵa aıyppul salý usynylǵan.

Sonymen qatar, elde betti jasyratyn kıim kııýge aıyppul salý usynylyp otyr. 

Sondaı-aq Qyrǵyzstanda qoǵamdyq orynda azamattardyń jeke basyn anyqtaýǵa múmkindik bermeıtindeı betin jaýyp turatyn kıim kıip, kólemdi saqal qoıǵan azamattarǵa zań boıynsha aıyppul salý usynylǵan edi.