Qyrǵyzstan medıtsına qyzmetkerlerine, muǵalimderge kúsh kórsetkenderge jazany kúsheıtti

ASTANA.KAZINFORM — Qyrǵyzstan Qylmystyq kodeksine túzetýler engizip, medıtsına qyzmetkerlerine, muǵalimderge jáne basqa da mamandarǵa qatysty zorlyq-zombylyq úshin jazany kúsheıtti, dep habarlaıdy Kazinform agenttiginiń menshikti tilshisi. 

Qabyldanǵan túzetýlerge sáıkes, qyzmettik, kásibı mindetin atqaryp júrgen nemese qoǵamdyq boryshyn oryndap jatqan adamǵa jeńil dene jaraqatyn salsa, sonyń saldarynan densaýlyǵyna zaqym kelse nemese eńbekke ýaqytsha jaramsyz bolyp qalsa, ol úshin 50 myńnan 100 myń somǵa deıin (shamamen 300 myń – 600 myń teńge) aıyppul qarastyrylǵan.

Qyzmettik mindetin, kásibı qyzmetin nemese qoǵamdyq mindetin oryndaıtyn adamǵa qatysty jasalǵan buzaqylyq úshin de jaza belgilengen. Bul qylmys úshin 50 myńnan 100 myń somǵa deıin (shamamen 300 myńnan 600 myń teńgege deıin) aıyppul salynady nemese úsh jyldan bes jylǵa deıin bas bostandyǵynan aıyrý jazasy qarastyrylǵan.

Buǵan deıin Qyrǵyzstanda alaıaqtyq úshin jaza kúsheıtilgeni habarlanǵan.