Qyrǵyzstan Máskeý monshasynda mıgranttarmen bolǵan oqıǵaǵa qatysty málimdeme jasady
ASTANA. KAZINFORM — 10 sáýirde Máskeýdegi «Bodrost» monsha kesheninde Qyrǵyzstannan kelgen bir top eńbek mıgranty kúshpen ustaldy, dep habarlaıdy Kazinform tilshisi.
Qyrǵyzstan Syrtqy ister mınıstrliginiń habarlaýynsha, 14 sáýirde Reseıdiń Qyrǵyz Respýblıkasyndaǵy elshisi Sergeı Vakýnovqa resmı nota tapsyrylǵan. Onda quqyq qorǵaý organdary júrgizgen operatsııanyń, sondaı-aq Qyrǵyzstan azamattaryna qarsy kúsh qoldanýdyń negizdemesin berýdi jáne kúsh qoldaný negizsiz bolǵan jaǵdaıda Máskeý ókilderine osy oqıǵaǵa qatysty tıisti shara qoldanýdy suraǵan.
Qyrǵyz tarapy el azamattarynyń quqyqtaryn qorǵaý jáne Qyrǵyz-Reseı odaqtastyq jáne strategııalyq áriptestik qatynastaryna nuqsan keltirýi múmkin osyndaı jaǵdaıdyń qaıtalanýyn boldyrmaý úshin tıimdi sharalar qabyldaýǵa shaqyrdy.
Qyrǵyz Respýblıkasynyń Eńbek, áleýmettik qamsyzdandyrý jáne kóshi-qon mınıstrligi bul oqıǵany muqııat tekserý qajettigin alǵa tartty.
Vedomstvonyń málimetinshe, Máskeý monshasynda reıd kezinde 59 qyrǵyz azamaty bolǵan, onyń 24-i ustalǵan. Qazirgi ýaqytta Qyrǵyzstannyń eki azamaty ýaqytsha ustaý ızolıatorynda otyr. Mınıstrliktiń Máskeýdegi ókildigi zardap shekken otandastarǵa jedel túrde jan-jaqty qoldaý kórsetip jatyr.
— Zardap shekkenderge quqyqtyq rásimdi bastaý úshin resmı aryz berý múmkindigi usynyldy. Alaıda, zardap shekkender jeke sebepterge baılanysty aryz berýden bas tartty. Vedomstvo ókildigi protsestik áreketter júrgizilip jatqan Qyrǵyz Respýblıkasynyń azamattary N.M. jáne A.S.-ǵa quqyqtyq qoldaý kórsetip jatyr. Máskeý qalasynyń Soltústik ákimshilik okrýgi boıynsha Reseı Federatsııasy ІІM basqarmasymen ózara is-qımyl qolǵa alyndy, — delingen habarlamada.
Qyrǵyz Respýblıkasy azamattarynyń quqyqtary men zańdy múddelerin qorǵaý maqsatynda Qyrǵyz Respýblıkasy Eńbek mınıstrliginiń ókildigi QR Bas prokýratýrasyna, Іshki ister mınıstrligine, Máskeý qalalyq prokýratýrasyna, Reseı Federatsııasyndaǵy Adam quqyqtary jónindegi ýákiline, sondaı-aq Reseı Federatsııasynyń zańnamalyq aktilerine sáıkes oqıǵany qabyldaý boıynsha basqa da quzyretti organdarǵa resmı ótinishter tizimin jiberdi.
Sáýirdiń 14-i kúni Qyrǵyz Respýblıkasy Joǵarǵy Keneshiniń Halyqaralyq ister, qaýipsizdik jáne kóshi-qon komıtetiniń otyrysynda Syrtqy ister mınıstri Jeenbek Kýlýbaev Máskeý monshasyndaǵy qyrǵyz azamattaryna qatysty atyshýly is odan ári kelissózder júrgizýge jáne ýltımatýmdar qoıýǵa jaǵdaı týǵyzatynyn málimdedi.
Aıta keteıik, bıyl aqpan aıynda Qyrǵyzstan Reseı Federatsııasyna óz mıgranttarynyń turýyna qatysty dıplomatııalyq nota joldaǵan bolatyn.