Qyrǵyzstan mas kúıinde kólik júrgizý úshin jazany kúsheıtti
BІShKEK. KAZINFORM – El parlamenti jol qaýipsizdigine qatysty zańnamalyq túzetýlerdi úshinshi oqylymda qabyldady, dep habarlaıdy Kazinform agenttiginiń Bishkektegi menshikti tilshisi.
Túzetýlerge sáıkes, jol qozǵalysy erejelerin buzǵan júrgizýshiler jaýapkershiligi kúsheıtildi.
Atap aıtqanda:
* júrgizýshiniń jol qozǵalysy qaýipsizdigi erejelerin jáne kólik quraldaryn paıdalaný erejelerin buzyp, saldarynan densaýlyqqa jeńil zııan keltirilgen jaǵdaıda úsh jylǵa deıin belgili bir qyzmetpen aınalysý quqyǵynan aıyra otyryp, 80 myńnan 100 myń somǵa deıin (431 myńnan 539 myń teńgege deıin) aıyppul salý;
* júrgizýshiniń jol qozǵalysy qaýipsizdigi erejelerin jáne kólik quraldaryn paıdalaný erejelerin buzyp, saldarynan densaýlyqqa aýyr zııan keltirilgen jaǵdaıda 100 myńnan 200 myń somǵa deıin (539 myńnan 1 078 000 teńgege deıin) aıyppul salý nemese úsh jyldan alty jylǵa deıin belgili bir qyzmetpen aınalysý quqyǵynan aıyra otyryp bes jylǵa deıin bas bostandyǵynan aıyrý;
• densaýlyqqa asa aýyr zııan keltirgeni úshin alty jyldan toǵyz jylǵa deıingi merzimge belgili bir qyzmetpen aınalysýǵa tyıym salýmen qatar bes jyldan segiz jylǵa deıingi merzimge bas bostandyǵynan aıyrý;
• alkogol, esirtki nemese basqadan masaıý kúıinde jol-kólik oqıǵasyn jasap, saldarynan densaýlyqqa jeńil nemese aýyr zııan keltirgeni úshin alty jyldan toǵyz jylǵa deıingi merzimge belgili bir qyzmetpen aınalysýǵa tyıym salýmen qatar bes jyldan segiz jylǵa deıingi merzimge bas bostandyǵynan aıyrý;
* Mas kúıinde jol qozǵalysy erejelerin buzý, sonyń saldarynan densaýlyqqa asa aýyr zııan keltirgeni úshin segiz jyldan on jylǵa deıin bas bostandyǵynan aıyrýmen qatar belgili bir qyzmetpen aınalysý quqyǵynan toǵyz jyldan on eki jylǵa deıin aıyrý;
* kólikti mas kúıinde qaıta júrgizgender 100 myńnan 150 myń somǵa deıin (539 myńnan 808 myń teńgege deıin) aıyppul salýmen qatar belgili bir laýazymdardy atqarý quqyǵynan aıyrý nemese bir jylǵa deıin bas bostandyǵynan aıyrýmen jazalanady.
Zań jobasy sonymen qatar kólik quralyn temirjol jolynda, týnnelde, kópirde, jaıaý júrginshiler ótkelinde, kórinýi shekteýli qıylysta, trotýarlarda, pandýstarda, múgedekterge arnalǵan oryndarda qaldyrǵan nemese tótenshe jaǵdaılar qyzmeti, quqyq qorǵaý organdary, kommýnaldyq qyzmetter nemese qoǵamdyq kóliktiń jumysyna kedergi keltirgen jaǵdaıda ony arnaıy turaqqa májbúrlep súıretýge jol beredi. Kólikti súıretý jáne saqtaý shyǵyndaryn júrgizýshi óteıdi.
Osyǵan deıin Qyrǵyzstanda jol erejesin 3 ret óreskel buzǵan júrgizýshi qaıtadan emtıhan tapsyratynyn jazdyq.
