Qyrǵyzstan mas kúıde kólik júrgizgenderge jazany kúsheıtpekshi

ASTANA.KAZINFORM -Qyrǵyzstan alkogol men esirtki tutynyp, mas kúıde kólik júrgizgender úshin jazany kúsheıtpekshi.

Іshki ister mınıstrligi tıisti zań jobasyn ázirledi, ony qazirgi ýaqytta Qyrǵyzstan Parlamenti qarap jatyr.

Usynylyp otyrǵan zańnamalyq túzetýlerde:

* Alkogol, esirtki nemese basqa da mas kúıinde jasalǵan jol-kólik oqıǵasy aýyr dene jaraqatyn salýǵa nemese ólimge ákep soqqan jaǵdaıda, 10 jyldan 12 jylǵa deıingi merzimge bas bostandyǵynan aıyrý jazasy, osy merzimge kólik júrgizý jáne memlekettik qyzmette bolý quqyǵynan aıyrý jazasy;

* Alkogol, esirtki nemese basqa da mas kúıinde jasalǵan jol-kólik oqıǵasy, onsha aýyr emes dene jaraqatyn salýǵa ákep soqqan jaǵdaıda, 5 jyldan 7 jylǵa deıingi merzimge bas bostandyǵynan aıyrý jazasy, osy merzimge kólik júrgizý jáne memlekettik qyzmette bolý quqyǵynan aıyrý jazasy;

* Ákimshilik qamaýǵa alý merzimin 20 kúnge deıin uzartý (qazirgi ýaqytta 7 kúnge deıin);

* Mas kúıinde kólik júrgizgeni úshin júrgizýshi kýáliginen 2 jylǵa deıin aıyrý;

* Júrgizýshi kýáliginsiz mas kúıinde kólik júrgizgeni úshin 10 kúnge deıin qamaýǵa alý jazasy;

* Júrgizýshi medıtsınalyq tekserýden ótýden bas tartqany úshin júrgizýshi kýáliginen 2 jylǵa deıin aıyrý;

* Mas kúıinde nemese basqa jolmen kólik júrgizýge ruqsat bergeni nemese júrgizýge quqyǵy joq adamǵa kólik quralyn júrgizýge ruqsat bergeni úshin jeke tulǵalarǵa 20 000 som jáne zańdy tulǵalarǵa 55 000 som aıyppul salynady;

* Mas kúıinde jasalǵan jol qozǵalysy erejelerin óreskel buzǵany úshin sottalǵan adamdarǵa shartty túrde sottalý múmkindigin alyp tastaý;

* Mas kúıinde jasalǵan jáne bir nemese birneshe adamnyń ólimine ákep soqqan jol-kólik oqıǵasy úshin jábirlenýshi tarappen tatýlasý arqyly qylmystyq jaýapkershilikten bosatý múmkindigin alyp tastaý.

Buǵan deıin Qyrǵyzstan áskerdegi álimjettik jazasyn kúsheıtetinin habarlaǵan edik.