Qyrǵyzstan makýlatýra men karton eksportyna tyıymdy uzartty
ASTANA. KAZINFORM – Qyrǵyzstanda qaıta óńdeletin qaǵaz ben kartondy el aýmaǵynan shyǵarýǵa salynǵan tyıym uzartyldy, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan Mınıstrler kabınetiniń qaýlysyna sáıkes, EAEO syrtqy ekonomıkalyq qyzmetiniń taýar nomenklatýrasyndaǵy 4707 kody boıynsha jikteletin taýarlardy elden shyǵarýǵa alty aı merzimge tyıym salynady.
Shekteý tranzıtke jáne Mınıstrler kabıneti tarapynan kórsetiletin gýmanıtarlyq kómekke qoldanylmaıdy.
– Bul sharalar ishki naryqty qoljetimdi shıkizatpen qamtamasyz etýge baǵyttalǵan, – delingen habarlamada.
Qyrǵyzstan Ekonomıka jáne kommertsııa mınıstrligine ýaqytsha tyıym týraly Dúnıejúzilik saýda uıymy men Eýrazııalyq ekonomıkalyq komıssııany belgilengen tártippen habardar etý tapsyryldy.
Al Syrtqy ister mınıstrligi TMD Atqarýshy komıtetine aqparat beredi. Memlekettik keden qyzmeti men Memlekettik shekara qyzmeti atalǵan taýarlardyń zańsyz shyǵarylýyna jol bermeý úshin qajetti sharalar qabyldaıdy.
Buǵan deıin Qyrǵyzstan qara metall synyqtary men qaldyqtaryn, áktas, sondaı-aq aǵash pen orman materıaldaryn eksporttaýǵa salynǵan tyıymdy uzartqan edi.
