Qyrǵyzstan makýlatýra eksportyn ýaqytsha toqtatty

ASTANA. KAZINFORM — Qyrǵyzstanda qalpyna keltirilgen qaǵaz ben kartondy Eýrazııalyq ekonomıkalyq odaq aýmaǵynan shyǵarýǵa ýaqytsha tyıym salyndy, dep habarlaıdy Kabar.

Qyrǵyz Respýblıkasynyń Mınıstrler kabıneti kórsetetin gýmanıtarlyq kómek pen tranzıtti qospaǵanda, Eýrazııalyq ekonomıkalyq odaqtyń kedendik aýmaǵynan qalpyna keltirilgen qaǵaz ben kartondy (makýlatýra men qaldyqtar) syrtqa shyǵarýǵa alty aı merzimge ýaqytsha tyıym salý engizildi. Bul ónimder EAEO-nyń Taýar nomenklatýrasy boıynsha 4707 kody boıynsha jikteledi. Tyıym osy qaýly kúshine engen kúnnen bastap úsh kún ótken soń qoldanysqa engiziledi.

Tıisti sheshimge Qyrǵyz Respýblıkasynyń Mınıstrler kabıneti tóraǵasy Adylbek Kasymalıev qol qoıdy.

Qaýlynyń maqsaty — ishki naryqta shıkizat resýrstarynyń tapshylyǵyna jol bermeý, óndiristi yntalandyrý jáne daıyn ónim eksportyn ulǵaıtý.

Osydan buryn Qyrǵyzstanda kómirdi kólikpen shyǵarýǵa ýaqytsha tyıym salynǵany habarlandy.