Qyrǵyzstan Konstıtýtsııasyna ólim jazasyn engizý usynyldy
ASTANA. KAZINFORM — Qyrǵyz Respýblıkasynyń Prezıdent ákimshiligi áıelder men balalarǵa zorlyq-zombylyq jasap, óltirgenderge qatysty ólim jazasyn engizýdi kózdeıtin Konstıtýtsııaǵa túzetýler engizý týraly bastama kóterdi, dep habarlaıdy Kazinform agenttiginiń menshikti tilshisi.
Tıisti zań jobasy qoǵamdyq talqylaýǵa shyǵaryldy.
Elde balalar men áıelderge qatysty zorlyq-zombylyqpen baılanysty asa aýyr qylmystyń jyl saıyn ósýi baıqalady.
— Inıtsıatorlardyń aıtýynsha, resmı statıstıka balalardy zorlaý faktileriniń naqty aýqymyn tolyq kórsete almaıdy. Mundaı qylmys boıynsha statıstıkany júrgizýdiń qıyndyǵy ata-analardyń, balalar men áıelderdiń zorlyq faktilerin jasyrýynda. Qoǵamdyq áshkereleýden qoryqqan jábirlenýshiler men olardyń týystary oqıǵany jasyrýǵa tyrysyp, sonyń saldarynan balalarǵa orny tolmas psıhologııalyq zııan keledi. Al zorlyq-zombylyq jasaǵandar jazasyz qalatynyn sezip, biraz ýaqyttan keıin basqa balalarǵa da osyndaı qylmys jasaýdy jalǵastyrady. Sońǵy jyldary balalar men áıelderge qatysty zorlyq-zombylyqtyń ósýi qoǵamdy ólim jazasyn qaıtarý týraly máseleni baıypty túrde qarastyrýǵa májbúr etti, — delingen túsindirmede.
Túzetýlerge sáıkes, Syrtqy ister mınıstrligine «Azamattyq jáne saıası quqyqtar týraly halyqaralyq paktiniń ólim jazasyn joıýǵa baǵyttalǵan ekinshi fakýltatıvtik hattamasyna Qyrǵyz Respýblıkasynyń qosylýy týraly» zańnyń kúshin joıý týraly qujatty saqtaýǵa tapsyrý tapsyryldy.
Eger «Qyrǵyz Respýblıkasynyń Konstıtýtsııasyna ózgeris engizý týraly» zań referendým arqyly qabyldansa, Jogorký Keneshtiń qaraýyna Qylmystyq kodekske, Qylmystyq-protsessýaldyq kodekske jáne Qylmystyq-atqarý kodeksine tıisti ózgerister engizý týraly zań jobalary usynylady.
Aıta ketelik Qyrǵyzstan Prezıdenti Sadyr Japarov áıelder men balalarǵa zorlyq-zombylyq jasap, adam óltirgenderge qatysty ólim jazasyn qaıta engizý bastamasyna túsinikteme berip, bul másele tek búkilhalyqtyq daýys berý arqyly sheshiletinin málimdegen edi.