Qyrǵyzstan Konstıtýtsııalyq soty ólim jazasyn engizý týraly prezıdent bastamasyn qarastyrady
ASTANA. KAZINFORM — Qyrǵyzstan Respýblıkasynyń prezıdentinen Konstıtýtsııalyq sotqa «Qyrǵyzstan Konstıtýtsııasyna ózgeris engizý týraly» zań jobasyna qorytyndy berý jóninde usynys tústi, dep habarlaıdy Kabar agenttigi.
Zań jobasynda Konstıtýtsııanyń 25-babynyń 1-bóliginde ózgeris engizý usynylady, ol boıynsha balalarǵa qatysty seksýaldyq sıpattaǵy asa aýyr qylmystarǵa jáne zorlyq-zombylyq jasap, kisi óltirgenderge ólim jazasyn erekshe jaza sharasy retinde qoldaný múmkindigi qarastyrylady.
Qosymsha materıaldarda kórsetilgendeı, bul bastama balalar men áıelderge qatysty asa aýyr qylmystardyń ósýimen baılanysty jáne olardyń konstıtýtsııalyq-quqyqtyq qorǵalýyn kúsheıtýge baǵyttalǵan.
Usynylyp otyrǵan ózgerister qabyldanǵan jaǵdaıda, Qyrǵyzstan Respýblıkasynyń halyqaralyq mindettemelerine qatysty máseleler keıingi quqyqtyq jáne qajetti rásimder aıasynda sheshiledi.
Qyrǵyzstan Respýblıkasynyń prezıdenti Konstıtýtsııanyń 116-babynyń 4-bóligin basshylyqqa ala otyryp, atalǵan zań jobasyna resmı qorytyndy suraǵan.
Eske salsaq, 30 qyrkúıekte Qyrǵyzstannyń Ystyqkól oblysynda 17 jastaǵy qyzdyń urlanǵany, zorlanǵany jáne óltirilgeni týraly aqparat tarady. Qyrǵyzstan prezıdentiniń baspasóz hatshysy Asqat Alagózov kámeletke tolmaǵan Aısulýdyń erekshe aıýandyqpen óltirilýine qatysty is prezıdent Sadyr Japarovtyń jeke baqylaýynda ekenin habarlady.
Budan buryn Qyrǵyz Respýblıkasynyń Prezıdent ákimshiligi áıelder men balalarǵa zorlyq-zombylyq jasap, óltirgenderge qatysty ólim jazasyn engizýdi kózdeıtin Konstıtýtsııaǵa túzetýler engizý týraly bastama kótergen edi.
Sondaı-aq Qyrǵyzstan prezıdenti Sadyr Japarov áıelder men balalarǵa zorlyq-zombylyq jasap, adam óltirgenderge qatysty ólim jazasyn qaıta engizý bastamasyna túsinikteme berip, bul másele tek búkilhalyqtyq daýys berý arqyly sheshiletinin málimdedi.