Qyrǵyzstan kompanııalaryn sanktsııalyq tizimderden shyǵarý sharalaryn ázirlep jatyr
BІShKEK. KAZINFORM – El úkimeti halyqaralyq sanktsııalardy qoldaný máselelerin talqylady, dep habarlaıdy Kazinform agenttiginiń Bishkektegi menshikti tilshisi.
Mınıstrler kabıneti baspasóz qyzmetiniń málimetinshe, úkimet basshysy Adylbek Qasymalıevtiń memlekettik organdar men salalyq vedomstvolarynyń ókilderimen jumys keńesinde qazirgi jaǵdaı, táýekelder jáne qoldanystaǵy shekteýlerdiń yqtımal saldary talqylanyp, olardy birtindep alyp tastaý boıynsha usynystar ázirlendi.
Halyqaralyq mindettemelerdi oryndaý, syrtqy ekonomıkalyq qyzmettiń ashyqtyǵyn arttyrý jáne eksporttyq jáne ımporttyq operatsııalardy baqylaýdy kúsheıtý boıynsha qabyldanǵan sharalarǵa, sondaı-aq Qyrǵyzstannyń batys seriktesterimen sanktsııalyq máseleler boıynsha úzdiksiz dıalogyna erekshe nazar aýdaryldy.
Májilis qorytyndysy boıynsha memlekettik organdarǵa saldary keri áser etetin jaǵdaılardy azaıtý, qyrǵyzstandyq kompanııalardy batystyń sanktsııa salǵan nysandarynyń tiziminen alyp tastaý baǵytynda keshendi sharalar ázirleý tapsyryldy.
Eske sala ketsek, naýryz aıynda Qazaqstanǵa kelgen Eýropalyq odaqtyń sanktsııalar jónindegi arnaıy ókili Devıd O’Sallıvan Eýropalyq odaq Qazaqstannan jetkiziletin munaıǵa eshqandaı shekteý qoımaǵanyn málimdedi.
