Qyrǵyzstan kóleńkeli ekonomıkamen kúreske bet burdy - sarapshy
Sońǵy aptada qyrǵyzstandyq kásipkerlerdiń eldegi salyq ózgeristerine qarsy narazylyqtary jıiledi. Qyrǵyz saıasattanýshysy Baqyt Baketaev Kazinform tilshisine bergen suhbatynda elde júrgizilip jatqan salyq reformasy, sondaı-aq saýdagerlerdiń jańa salyq rejımin engizýmen kelispeýiniń sebepteri týraly aıtty.
Sarapshy prezıdent Sadyr Japarov basqaratyn jańa bılik sybaılas jemqorlyq jáne kóleńkeli ekonomıkamen kúresýdiń jańa baǵytyn belgilegenin aıtady.
- Bıylǵy jyldyń basty jetistigi salyq kólemin bes ese arttyrý boldy. Jeltoqsanǵa qaraı Qyrǵyzstannyń JІÓ 1 trıllıon somnan asty, - dedi saıasattanýshy.
Baqyt Baketaevtyń pikirinshe, ótken 30 jyl ishinde Qyrǵyzstan azamattary baı kedeı elge aınaldy. Buǵan jan basyna shaqqandaǵy qymbat avtomobılder, elıtalyq úıler, týrıstik saparlar jáne basqa da brendtik zattar statıstıkasy dálel bola alady.
– Resmı derekke súıensek, eldiń jan basyna shaqqandaǵy jalpy ishki ónimi 1200 dollardan asady. Sonymen qatar, kóleńkeli qarjy aǵyndaryn eskersek, bul kórsetkishti shamamen beske kóbeıtýge bolady. Qyrǵyzstanda kóp jyldar boıy iri kóterme jetkizýshiler tarapynan naryqqa jetkiziletin taýar kólemi men bólshek saýdada satylatyn taýar kóleminiń arasynda úlken aıyrmashylyq bar, - dedi ol.
Saıasattanýshy saýda-sattyq qyzmetine kassalyq baqylaý mashınalaryn engizýdi joıý - ótkenge oralýmen birdeı dep esepteıdi. Álemniń barlyq damyǵan elderinde taýarlar qozǵalysyn esepke alý kassalyq baqylaý mashınalary arqyly júzege asyrylady, odan basqa ádisti álem áli oılap tapqan joq. Osyǵan baılanysty Qyrǵyzstannyń Mınıstrler Kabıneti memlekettiń kóleńkeli ekonomıkasyn jaryqqa shyǵarý boıynsha turaqty jumys júrgizýde.
- Úkimet kásibin jańa bastaǵandarǵa, shaǵyn jáne orta bıznesmenderge segiz mıllıon som aınalymǵa deıingi patentpen jumys isteýge múmkindikter beredi, tipti kassalyq baqylaý mashınalaryn paıdalanǵan jaǵdaıda nóldik mólsherleme bar, alaıda naryqtyń belgili nemese kóptegen iri qatysýshylary naqty qarjy aǵyndaryn kórsetkisi kelmeıdi. Elde barlyq baǵytta aýqymdy reformalar júrip jatyr, bul jaǵdaıda ekonomıkaǵa keri áserin tıgizýshi biraz kásip ıeleri anyqtalýy tıis, - dedi sarapshy.
Esterińizge sala keteıik, Qyrǵyzstanda qarasha aıynyń sońynan bastap búkil el boıynsha jańa salyq rejımine qarsy saýdagerler mıtıngileri ótýde. Keshe el prezıdenti Sadyr Japarov iri «Dordoı» bazarynyń saýda oryndary ıeleriniń mıtıngisine qatysyp, kásipkerler úshin saýda salasyndaǵy patenttik júıe 2024 jyldyń shildesine deıin uzartylatynyn málimdedi.
