Qyrǵyzstan kók bóri komandasy – Kóshpendiler oıyndarynyń chempıony
ASTANA. KAZINFORM – Qyrǵyzstan kók bóri komandasy dúnıejúzilik kóshpendiler oıyndarynyń chempıony atandy.
Aqtyq synda Qazaqstan men Qyrǵyzstan kók bóri komandalary kezdesken bolatyn. Eki komanda jeńis úshin baryn salyp, erekshe oıyn órnegin kórsetti. Nátıjesinde 10: 4 upaımen Qyrǵyzstan komandasy kók bóri oıyndarynyń «altyn» júldesin qanjyǵalady. Qazaqstandyq shabandozdar kóshpendiler oıyndarynyń kúmis júldegeri atandy.
Aıta keteıik, keshe qazaqstandyq shabandozdar Túrkııanyń kók bóri komandasyn 15:1 esebimen utyp, fınalǵa joldama alǵan. Al Qyrǵyzstan komandasy jartylaı fınalda Reseı komandasymen kezdesip,11:6 esebimen jeńiske jetken edi.
Kók bóri – Qyrǵyz halqynyń jaýyngerlik at sporty óneri. Bul oıynǵa bilekti de júrekti jigitter menbeldi attar irikteledi. Jeńiske jetý úshin de tulpar men sportshynyń birlesip áreket etkeni asa mańyzdy. Serkeni jerden alyp úlgergen shabandoz dodany jaryp ótip, ony qarsylas komandanyń qazandyǵyna salýy kerek.
