Qyrǵyzstan kazınoǵa barǵandardy 5 jylǵa deıin sottaıtyn zań jobasyn ázirlep jatyr
Kazınoǵa barǵan Qyrǵyzstan azamattaryn bes jylǵa deıin bas bostandyǵynan aıyrý usynylyp otyr. Bul týraly parlamenttiń bıýdjet, ekonomıkalyq jáne fıskaldyq saıasat komıtetiniń otyrysynda depýtat Marlen Mamatalıev málim etti, dep habarlaıdy Kazinform agenttigi 24.kg basylymyna silteme jasap.
Onyń aıtýynsha, jaqyn arada tıisti zań jobasy Jogorký Keneshke jiberiledi.
«Kazıno, býkmekerlik keńseler endi bir jerde jumys isteıtin bolady. Bul mekemege Qyrǵyzstan azamaty barsa, lıtsenzııasynan aıyrylady. Ekinshiden, sarapshylar tobynda azamattarǵa aıyppul salyp qana qoımaı, eki jyldan bes jylǵa deıin bas bostandyǵynan aıyrý kerek degen usynys aıtyldy. Bul jaǵdaıda Qyrǵyz Respýblıkasynyń bir de bir azamaty kazınoǵa barmaıdy dep oılaımyn», - dedi halyq qalaýlysy.
Esterińizge sala keteıik, «Qyrǵyz Respýblıkasyndaǵy oıyn qyzmeti týraly» zańǵa sáıkes 21 jasqa tolmaǵan Qyrǵyzstan azamattary, sheteldikter nemese múmkindigi shekteýli azamattar oıyn mekemesiniń klıenti bola almaıdy.
