Qyrǵyzstan Qazaqstanmen jáne ózge kórshilerimen ekologııalyq qaýipsizdikti qamtamasyz etýge daıyn
ASTANA. KAZINFORM – Qyrǵyzstanda sý resýrstary azaıyp bara jatyr. Bul jóninde atalǵan eldiń prezıdenti Sadyr Japarov Óńirlik ekologııalyq sammıtte málimdedi.
– Keıingi ondaǵan jylda Ystyqkóldiń deńgeıi 14 metrge tómendedi. Al oǵan quıatyn ózender sany 100-den 30-ǵa azaıdy, - dedi ol.
Sý qorynyń kemýi energetıka salasyna da áser etip otyr.
– Qyrǵyzstan energetıkasynyń 93%-y gıdroelektrstantsııalarǵa táýeldi. Sý tapshylyǵy saldarynan qysta energııa jetispeýi máselesi týyndaıdy, - dedi Sadyr Japarov.
Sonymen birge, onyń sózinshe, Qyrǵyzstan – sý resýrstary tolyqtaı óz aýmaǵynda qalyptasatyn aımaqtaǵy jalǵyz el. Onyń terrıtorııasynda jyl saıyn 50 mlrd tekshe metr sý qalyptasady. Sonyń 12 mlrd tekshe metrin ózi qoldanyp, 38 mlrd tekshe metrin kórshiles elderge jiberedi.
– Bul máselede biz kórshilerimizben tyǵyz qarym-qatynasta bolý ári sýdy ózara tıimdi bólisý ustanymyndamyz. Orta Azııanyń energetıka, aýyl sharýashylyǵy jáne áleýmettik-ekonomıkalyq salalardaǵy qaýipsizdigin eskerip, sýdy bólýdiń ondaǵan jyldan beri kele jatqan shekti mólsherin saqtap kele jatyrmyz, - dedi qyrǵyz prezıdenti.
Sonymen qatar ol sý ınfraqurylymyn, sý júretin arnalardy birlesip jóndeýdi usyndy.
Budan bólek, Sadyr Japarov Qyrǵyzstannyń Qazaqstan, Ózbekstan t.b. kórshilerimen sý resýrstaryn tıimdi basqarý, energetıka jáne ekologııalyq qaýipsizdik sektorynda yntymaqtastyqty nyǵaıtýǵa daıyn ekenin málimdedi.
Aıta keteıik, buǵan deıin Armenııa Qazaqstannyń sý resýrstaryn tıimdi basqarý baǵytyndaǵy bastamalaryn qoldaıtynyn jazǵanbyz.
