Qyrǵyzstan Qazaqstanǵa 300 tonna gýmanıtarlyq kómek jiberdi
ASTANA.KAZINFORM — Qyrǵyzstannyń Tótenshe jaǵdaılar mınıstrliginiń qutqarýshylary sý tasqynynan zardap shekken Qazaqstan halqyna 300 tonna gýmanıtarlyq júk jiberdi.
Qyrǵyz Respýblıkasynyń Prezıdenti Sadyr Japarovtyń tapsyrmasy boıynsha eldiń Tótenshe jaǵdaılar mınıstrligi «Azyq-túlik kerýeni» gýmanıtarlyq júgin uıymdastyrdy. Turǵyndarǵa kúnbaǵys maıy, qant, kúrish, makaron jáne kondıterlik ónimder, sondaı-aq jergilikti jerde óndirilgen matratstar, kıim-keshek, shatyrlar jetkiziledi.
Gýmanıtarlyq júk tıelgen avtokolonna 6 sáýir kúni tańǵy saǵat 4-te Qazaqstanǵa attandy.
Esterińizge sala keteıik, 4 sáýirde QR Mınıstrler kabınetiniń basshysy Aqylbek Japarov Jogorký Keneshtiń otyrysynda sóılegen sózinde Qyrǵyzstan jaqyn arada sý tasqynynan zardap shekken Qazaqstan óńirlerine gýmanıtarlyq kómek jiberýdi josparlap otyrǵanyn aıtqan edi.
