Qyrǵyzstan Qazaqstandaǵy konstıtýtsııalyq ózgeristerdi qoldaıdy — Jogorký Kenesh tóraǵasy
ASTANA. KAZINFORM — Marlen Mamatalıev Qasym-Jomart Toqaevqa kezdesý úshin alǵys aıtyp, Prezıdent Sadyr Japarovtyń ystyq yqylasyn jetkizdi, dep habarlaıdy Aqordanyń baspasóz qyzmeti.
— Qyrǵyz tarapy Sizdiń basshylyǵyńyzben iske asyrylǵan aýqymdy konstıtýtsııalyq ózgeristerdi qoldaıdy. Men muny senimdi túrde aıta alamyn. Bul ádiletti ári ozyq Qazaqstandy qurýǵa berik negiz qalaıdy. Sizge jáne baýyrlas Qazaqstan halqyna beıbitshilik, baq-bereke tileımin. Qolǵa alǵan reformalardy tabysty júzege asyrýlaryńyzǵa tilektespin, — dedi Jogorký Kenesh tóraǵasy.
Kezdesý barysynda parlamentaralyq baılanystardy damytý jáne joǵary deńgeıde qol jetkizilgen ekijaqty ýaǵdalastyqtardy zańnamalyq turǵydan tıimdi qamtamasyz etý máseleleri talqylandy.
Eki elde júrgizilip jatqan júıeli áleýmettik-ekonomıkalyq reformalar jóninde mazmundy ári egjeı-tegjeıli áńgime órbidi.
Prezıdent pen Jogorký Kenesh tóraǵasy Qazaqstan men Qyrǵyzstannyń strategııalyq seriktestik jáne odaqtastyq qarym-qatynasyn jan-jaqty damytýǵa beıil ekenin rastady.
Buǵan deıin Prezıdent Shymkent qalasynyń damý qarqyny týraly eseppen tanysqanyn jazdyq.
