Qyrǵyzstan, Qazaqstan jáne Ózbekstan ókilderi Qambarata-1 sý elektr stantsııasy jobasyna qatysty kezdesti
ASTANA. KAZINFORM — Ystambul qalasynda Dúnıejúzilik banktiń qoldaýymen Qyrǵyz Respýblıkasy, Qazaqstan jáne Ózbekstan ókilderiniń qatysýymen Kambarata-1 sý elektr stantsııasyn salý jobasy boıynsha tehnıkalyq kezdesý ótti.
Kelissózderge Qazaqstan tarapynan Energetıka vıtse-mınıstri Erjan Ertaev pen Sý resýrstary jáne ırrıgatsııa vıtse-mınıstri Arsen Jaqanbaev qatysty.
Kezdesý barysynda Qyrǵyz Respýblıkasyndaǵy Naryn ózeninde qýaty 1 860 MVt bolatyn Qambarata-1 sý elektr stantsııasyn salý jobasyn iske asyrýdyń aldaǵy qadamdary talqylandy. Joba úsh memlekettiń úkimetimen birlesip júzege asyrylyp jatyr jáne óńirlik sý-energetıkalyq yntymaqtastyqty damytýda strategııalyq mańyzǵa ıe.
Taraptar jobany iske asyrýǵa qatysty negizgi tehnıkalyq máselelerdi qarastyryp, birlesken jumystyń aldaǵy baǵyttary jóninde pikir almasty. Sondaı-aq sý-energetıka salasyndaǵy ózara is-qımyl perspektıvalaryn talqylady.
QR Energetıka mınıstrligi málimetinshe, Qambarata-1 sý elektr stantsııasyn iske asyrý Ortalyq Azııanyń energetıkalyq áleýetin arttyrýǵa, sondaı-aq energetıka jáne sý resýrstaryn utymdy paıdalaný salalaryndaǵy óńirlik yntymaqtastyqty nyǵaıtýǵa úles qosady.
Ótken kezdesý Qazaqstan, Qyrǵyzstan jáne Ózbekstannyń óńirdiń sý-energetıka sektoryn ornyqty damytýǵa baǵyttalǵan birlesken jobany ilgeriletý jolyndaǵy ózara is-qımylynyń kezekti mańyzdy kezeńi boldy.
Qyrǵyzstandaǵy «Qambarata-1» sý elektr stantsııasynyń qurylysy qalaı júrip jatqanyn jazǵan edik.
