Qyrǵyzstan kartop ımportyna tyıym salmaq
ASTANA. KAZINFORM — Qyrǵyzstanda kartop ımportyna alty aı merzimge ýaqytsha shekteý engizý usynyldy, dep habarlaıdy Kazinform-nyń Bishkektegi menshikti tilshisi.
Osyǵan qatysty Qyrǵyz Respýblıkasy Mınıstrler kabınetiniń qaýlysy qoǵamdyq talqylaýǵa usynyldy.
Bul shara kartopty jappaı jınap, naryqqa shyǵarý kezeńinde jergilikti óndirýshilerdiń múddesin qorǵap, ishki naryqtaǵy turaqtylyqty qamtamasyz etýge baǵyttalǵan.
Qyrǵyzstan Aýyl sharýashylyǵy mınıstrliginiń málimetinshe, 2026 jyldyń qańtar-shilde aılarynda elge 24,7 myń tonna kartop ımporttalǵan. Onyń basym bóligi Qytaıdan jetkizilgen. Sonymen qatar kartop Germanııa, Qazaqstan, Pákistan, Iran, Reseı jáne Ózbekstannan da ákelingen.
2026 jyldyń alǵashqy jeti aıynda Qyrǵyzstanda 486 myń tonna otandyq kartop óndirildi. Jyl sońyndaǵy jalpy ónim kólemi shamamen 1 mln 249,7 myń tonna bolady dep josparlanǵan. Bul kórsetkish el halqynyń ishki qajettiligin 450 myń tonnaǵa arttyryp, suranysty 156,3 paıyzǵa qamtamasyz etedi.
Eger naryqtaǵy jaǵdaı rettelip, elde kartop tapshylyǵynyń qaýpi týsa, ýaqytsha tyıym merziminen buryn alynýy múmkin.
Shekteý Qyrǵyzstan aýmaǵy arqyly ótetin tranzıttik tasymaldarǵa, tyıym kúshine engenge deıin jolǵa shyqqan júkterge, sondaı-aq ǵylymı-zertteý jáne synaq júrgizýge arnalǵan kartopqa qoldanylmaıdy.
Buǵan deıin Qyrǵyzstan qurylys materıaldarynyń birqatar túrine ýaqytsha tyıym salǵan edi.
