Qyrǵyzstan karantındik aýrýlarǵa qarsy jańa jospar ázirledi
ASTANA. KAZINFORM — Qyrǵyzstan sanıtarııalyq qorǵaý erejeleri men 2026–2030 jyldarǵa arnalǵan is-qımyl josparyn jańartyp jatyr, dep habarlaıdy Kabar.
Qyrǵyz Respýblıkasynyń Densaýlyq saqtaý mınıstrligi «Qyrǵyz Respýblıkasynyń aýmaǵyn sanıtarııalyq qorǵaý qaǵıdalaryn jáne 2026–2030 jyldarǵa arnalǵan karantındik jáne asa qaýipti juqpaly aýrýlardyń elge ákelinýi/enýi men taralýynyń aldyn alý boıynsha epıdemııaǵa qarsy keshendi is-sharalar josparyn bekitý týraly» mınıstrler kabıneti qaýlysynyń jobasyn qoǵamdyq talqylaýǵa shyǵardy.
Densaýlyq saqtaý mınıstriniń orynbasary — bas memlekettik sanıtarlyq dáriger Ryspek Sydygalıev mınıstrlik Qyrǵyz Respýblıkasynyń Konstıtýtsııasyna, «Azamattardyń densaýlyǵyn qorǵaý týraly» zańyna jáne 2024 jylǵy 12 qańtarda qabyldanǵan «Qoǵamdyq densaýlyq saqtaý týraly» negizgi zańǵa súıenetinin aıtty. Qazirgi tańda eldiń sanıtarııalyq-epıdemıologııalyq qyzmeti osy zań aıasynda jumys isteıdi.
Onyń aıtýynsha, respýblıkada asa qaýipti karantındik ınfektsııalardyń aldyn alý jáne baqylaý jónindegi arnaıy Respýblıkalyq ortalyq jumys isteıdi. Elge kiretin jerlerde sanıtarııalyq-karantındik beketter bar. Qajet bolǵan jaǵdaıda ýaqytsha sanıtarııalyq karantın beketteri uıymdastyrylady. Sydygalıev atap ótkendeı, «Qoǵamdyq densaýlyq saqtaý týraly» zańnyń negizgi mindeti — juqpaly jáne juqpaly emes aýrýlardyń aldyn alý.
Ryspek Sydygalıev 2025 jyldyń qorytyndysy boıynsha sibir jarasy, týlıaremııa, oba, qutyrý sııaqty iri juqpaly aýrýlardyń órshýi tirkelmegenin alǵa tartty. Degenmen basqa ınfektsııalyq aýrýlar sanıtarııalyq-epıdemıologııalyq qyzmettiń baqylaýynda boldy.
— Qujatty buǵan deıin premer-mınıstr bekitken. Qazirgi tańda Mınıstrler kabıneti jumys isteıtindikten, jańartylǵan nusqa qoǵamdyq talqylaýǵa usynylyp otyr. 2020 jylǵy pandemııa tájirıbesin eskere otyryp, qujatta karantındik beketterdegi sharalardy kúsheıtýge qatysty ózgerister engizilgen, — dedi ol.
Jobanyń maqsaty — qoǵamdyq densaýlyq saqtaý týraly zańdy iske asyrý jáne el aýmaǵyn karantındik ári asa qaýipti juqpaly aýrýlardyń ákelinýi men taralýynan qorǵaý tártibi men sharttaryn naqtylaý.
Sydygalıevtiń aıtýynsha, álemdegi epıdemıologııalyq jaǵdaı, COVID-19 sekildi jańa ınfektsııalardyń taralýy, sondaı-aq qaýipti qozdyrǵyshtardy terrorıstik maqsatta qoldaný qaýpi túrli memlekettik qyzmetterdiń ózara úılesimdi áreket etý tetigin ázirleýdi talap etedi. Bul jumysqa tek Densaýlyq saqtaý mınıstrligi ǵana emes, basqa da vedomstvolar qatysýy tıis.
Atap aıtqanda, densaýlyq saqtaý, tótenshe jaǵdaılar, ishki ister, qarjy, sý resýrstary, aýyl sharýashylyǵy jáne óńdeý ónerkásibi, tabıǵı resýrstar, ekologııa jáne tehnıkalyq qadaǵalaý, qorǵanys, ulttyq qaýipsizdik, shekara qyzmeti, sondaı-aq jergilikti ákimshilikter men qala merııalary birlesip jumys isteýi qajet.
— Osyǵan baılanysty 2026–2030 jyldarǵa arnalǵan epıdemııaǵa qarsy keshendi jospar ázirlendi. Onyń maqsaty — karantındik asa qaýipti ınfektsııalardan týyndaıtyn tótenshe jaǵdaılarda birlesken profılaktıkalyq jáne epıdemııaǵa qarsy sharalardy josparlaý, uıymdastyrý jáne ótkizý, — dep túsindirdi maman.
Sydygalıev bul qujatty qabyldaý basqa normatıvtik aktilerge ózgeris engizýdi qajet etpeıtinin jáne qosymsha qarjylyq shyǵyndardy talap etpeıtinin aıtty.
— Joba bes kúnnen beri mınıstrlik saıtynda jarııalanǵan. 14 kún ishinde azamattar óz usynystary men pikirlerin joldaı alady, — dep túıindedi Densaýlyq saqtaý mınıstriniń orynbasary.
Budan buryn Qyrǵyzstanda alǵash ret aspaly jol ashylǵanyn jazǵan edik.