Qyrǵyzstan qant ımportyna tyıym salýdy josparlap otyr
ASTANA. KAZINFORM — Qyrǵyzstanda qant ákelýge 6 aı merzimge ýaqytsha tyıym salý usynyldy, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan Mınıstrler kabınetiniń tıisti qaýlysy qoǵamdyq talqylaýǵa shyǵaryldy.
Bul shara otandyq qant qyzylshasyn ósirýshiler men qant zaýyttaryn qoldaýǵa baǵyttalǵan. Ýaqytsha tyıym 2026 jylǵy jergilikti qant qyzylshasyn óńdeý jáne odan óndirilgen qantty satý kezeńinde engizilmek.
Mundaı sheshimge ımport kóleminiń kúrt ósýi men sheteldik qant baǵasynyń tómendeýi sebep bolǵan. 2026 jyldyń qańtar-shilde aılarynda Qyrǵyzstanǵa 66,9 myń tonna qant ákelingen. Bul ótken jyldyń osy kezeńimen salystyrǵanda tórt ese kóp. Qant jetkizýshi negizgi elder qatarynda Brazılııa (29,96 myń tonna), Reseı (21,23 myń tonna), Ázerbaıjan (8,63 myń tonna), Qazaqstan (3,86 myń tonna) jáne Belarýs (2,03 myń tonna) bar.
Jańa ónimnen alynǵan qant naryqqa túspeı turyp, shetelden qant kóptep ákelinse, otandyq ónimge suranys azaıyp, qyzylsha ósirýshilerdiń tabysy azaıýy múmkin.
Alaıda bul shekteý Qyrǵyzstan arqyly tranzıtpen ótetin, sonyń ishinde EAEO elderi arasynda tasymaldanatyn aq qantqa, qaıta eksporttalatyn ónimge, «ekstra» surypty qantqa jáne tyıym kúshine engenge deıin Qyrǵyzstanǵa jóneltilgen júkterge qatysty bolmaıdy.
Buǵan deıin Qyrǵyzstanda kartop ımportyna ýaqytsha shekteý engizý usynylǵany habarlanǵan bolatyn.
