Qyrǵyzstan halyqaralyq ınternet-trafıkke ýaqytsha memlekettik monopolııa engizedi

ASTANA. KAZINFORM — Qyrǵyz Respýblıkasynyń prezıdenti Sadyr Japarov tıisti jarlyqqa qol qoıdy, dep habarlaıdy president.kg.

Qyrǵyz Respýblıkasynyń prezıdenti Sadyr Japarov «Qyrǵyz Respýblıkasynyń memlekettik kompanııalaryn tıimdi basqarýdy uıymdastyrý jáne tsıfrlyq ári telekommýnıkatsııalyq ınfraqurylymdy damytý jónindegi shuǵyl sharalar týraly» Jarlyqqa qol qoıdy.

— 2025 jylǵy 15 tamyzdan 2026 jylǵy 14 tamyzǵa deıin Qyrǵyz Respýblıkasynyń aýmaǵynda halyqaralyq ınternet-trafıkti jetkizý men usynýǵa ýaqytsha 100 paıyzdyq memlekettik monopolııany engizý boıynsha synaq (aprobatsııalyq) rejımi engizilsin, — delingen qujatta.

Bul synaq (aprobatsııalyq) rejımi kezeńinde halyqaralyq ınternet-trafıkti jetkizý men usynýǵa «ElKat» JShQ-na eksklıýzıvti quqyq berildi.

Buǵan deıin Sadyr Japarov azamattyń óz bank kartasyn, shotyn, elektrondy ámııanyn, mobıldi bankıngin, SIM-kartasyn nemese basqa qarjylyq derekterin úshinshi tulǵalarǵa berýge nemese satýǵa tyıym salatyn zańǵa qol qoıǵan bolatyn. Bul IT-tehnologııalar arqyly jasalatyn qylmystardyń aldyn alýǵa baǵyttalǵan.