Qyrǵyzstan energetıkalyq táýeldilikten qashan arylady

ASTANA.KAZINFORM - Qyrǵyzstannyń energetıka mınıstri Taalaıbek Ibraev elde elektr energııasy tapshylyǵy bolmaıtynyna sendirdi. Ol bul týraly Facebook paraqshasynda jazdy, dep habarlaıdy Kazinform menshikti tilshisi.

- Qyrǵyzstanda elektr energııasy tapshylyǵy bolmaıdy. Biz jaı ǵana tıimdi paıdalanýǵa shaqyramyz,- dedi mınıstr.

Mınıstrdiń aıtýynsha, Qyrǵyzstan elektr energııasyn jyldaǵydaı kórshi elderden 3 som baǵamen ımporttaıdy jáne ony turǵyndarǵa 1 som 37 tıyn baǵamen jetkizedi. Qun aıyrmashylyǵy taǵy da Qyrǵyzstannyń Ulttyq elektr jelisiniń balansynda qaryz retinde jınaqtalady.

- Osyǵan baılanysty prezıdent ımportty azaıtýdy, energııany únemdi paıdalanýdy jáne qalǵan 25 mıllıard som qaryzdy kelesi jyly óteýdi tapsyrdy. Biz qaryzdarymyzdy tolyq ótep, kelesi jyldan bastap paıda tabýdy josparlap otyrmyz. Bizdiń josparymyz boıynsha, 2028-2029 jyldyń qysyna qaraı elge elektr energııasyn ımporttaýdyń qajeti bolmaıdy, - dep málimdedi Taalaıbek Ibraev.

Aıta keteıik, Qyrǵyzstan energetıka salasynda 2023 jyldyń 1 tamyzynan 2026 jyldyń 31 jeltoqsanyna deıin tótenshe jaǵdaı jarııalandy.

2025 jyldyń qyrkúıeginde Qyrǵyzstannyń energetıka mınıstri «Kabar» aqparat agenttigine bergen suhbatynda azamattardy aldaǵy eń qıyn qys týraly eskertip, elektr energııasyn únemdeýge shaqyrdy. Qazirgi ýaqytta el óndirgennen kóp elektr energııasyn tutynady. Tapshylyq kórshi elderden elektr energııasyn ımporttaý arqyly jabylady.

Elektr energııasyn únemdeý úshin saǵat 18:00-den 06:00-ge deıin úı ishindegi jáne syrtqy jaryqtandyrý jáne úkimettik ǵımarattarda elektr qurylǵylaryn paıdalaný shekteldi. Mektepterde energııa únemdeý sharalary engizildi.

Zań talaptaryna sáıkes jáne energııany únemdeý maqsatynda Bishkektegi barlyq mádenı jáne oıyn-saýyq oryndary saǵat 22:00-den keıin jabylady.

Qyrǵyzstannyń burynǵy prezıdenti Almazbek Atambaıev energetıka salasyndaǵy jaǵdaı úshin Qyrǵyzstan bıligin synǵa aldy.

Eldegi elektr energııasy tapshylyǵynyń sebebi týraly myna jerden oqyńyz.