Qyrǵyzstan energetıkalyq sýsyndarǵa tyıym salýy múmkin
ASTANA. KAZINFORM — Qyrǵyzstan prezıdenti Sadyr Japarov úkimetke energetıkalyq sýsyndardy óndirý men ımporttaýǵa tyıym salý máselesin qarastyrýdy tapsyrdy, dep habarlaıdy Kazinform agenttiginiń Bishkektegi menshikti tilshisi.
Japarov qant pen kofeınge baı sýsyndardy júıeli túrde tutyný jas urpaq aǵzasyna aýyr zııan keltiretinin, júrek talmasyna, qant dıabetine jáne búırek aýrýlaryna ákep soqtyratynyn atap ótti. Sonyń saldarynan memleket azamattardyń emdelýine orasan zor qarajat jumsaıdy.
Onyń málimetteri boıynsha, 2025 jyly el turǵyndary shamamen 54,2 mıllıon lıtr nemese 129 mıllıon banka turmystyq energetıkalyq sýsyndardy tutynǵan. Ári bul kórsetkish udaıy ósip barady. 2026 jyldyń birinshi jartysynyń ózinde 36,8 mıllıon lıtrge (86 mıllıon banka) jetti.
Qyrǵyzstan basshysynyń aıtýynsha, halyqtyń densaýlyǵy úshin bılik sanaly túrde sheshýshi qadamdar jasaýǵa jáne osy saladan túsetin 1,5 mıllıard som salyqtan bas tartýǵa daıyn.
Nusqaýlyqqa sáıkes, Mınıstrler kabıneti bir aı ishinde energetıkalyq sýsyndardyń ımportyn, olardy óndirý men satýdy shekteý máselesin muqııat zertteýi kerek. Alty aı ishinde ol zańnama aıasynda tıisti retteý sharalaryn qabyldaýy kerek.
Eske sala keteıik, Qazaqstanda 21 jasqa tolmaǵandarǵa energetıkalyq sýsyn satýǵa qatań tyıym salynǵan.
2026 jyldyń 1 qańtarynan bastap Qazaqstandaǵy energetıkalyq sýsyndar aktsızdelgen taýarlar tizimine engizildi, aktsızdik salyq mólsherlemelerin kezeń-kezeńimen engizý kózdelgen.
