Qyrǵyzstan energetıka mınıstrligi halyqty elektr qýatyn únemdeýge shaqyrdy
ASTANA.KAZINFORM - Qyrǵyzstanda energetıka salasyndaǵy eskirgen jabdyqtardy qaıta jańǵyrtý jumystary bastalyp, úkimet el azamattaryn elektr energııasyn únemdeýge shaqyrdy, dep habarlaıdy Kazinform-nyń menshikti tilshisi.
Qyrǵyzstan Respýblıkasy Energetıka mınıstrliginiń málimetinshe, 20 aqpanda Toqtaǵul sý elektr stantsııasynyń gıdroagregattarynyń birin qaıta qurý bastalyp, onyń qýaty 300 MVt-qa qysqarǵan. 10 naýryzda Úsh-Qorǵan sý elektr stantsııasynyń bir gıdroagregaty da qaıta qurýǵa beriledi, qýaty 45 MVt tómendeıdi. Jumysty 2025 jyldyń jeltoqsanyna deıin aıaqtaý josparlanǵan.
– Vedomstvo barlyq abonentterden tańǵy saǵat 7:00-den 9:00-ge deıin jáne keshki saǵat 18:00-den 21:00-ge deıin elektr energııasyn únemdeýdi suraıdy. Elektr qýaty eń belsendi paıdalanylatyn ýaqytta júıe shamadan tys júktelýi múmkin, sondyqtan osy kezeńderde barlyq elektr jabdyqtaryn óshirý elektr qýatynyń shekten tys joǵarylaýyn boldyrmaıdy. Energetıkter toqtaýsyz elektr qýatymen qamtamasyz etý jáne isten shyqqan gıdroagregattardyń qýatyn tolyqtyrý qajettiligin eskere otyryp, halyqty balamaly elektr energııasyn aldyn ala paıdalanýǵa shaqyrady,- delingen habarlamada.
Aıta keteıik, 2023 jyldyń 1 tamyzynan 2026 jyldyń 31 jeltoqsanyna deıin Qyrǵyzstannyń energetıka salasynda tótenshe jaǵdaı rejımi engizilgen bolatyn. 2024 jyldyń jeltoqsan aıynyń basynda Qyrǵyzstan elektr qýatynyń tapshylyǵyna tap boldy.
Energetıka salasyndaǵy qarjy tapshylyǵyn azaıtý úshin Qyrǵyzstan Respýblıkasynyń Energetıka mınıstrligi 2030 jylǵa deıin jyl saıyn elektr energııasynyń qunyn 20 paıyzǵa kóterýdi usynyp otyr.
Osyǵan deıin Qyrǵyzstan bıligi bıznesti tekserýge qoıylǵan shekteýdi alyp tastaǵany týraly jazdyq.