Qyrǵyzstan eńbek mıgranttaryn elge qaıtarmaq
ASTANA. KAZINFORM — Naryn oblysyna jasaǵan jumys sapary aıasynda arnaıy tehnıkany tapsyrýǵa arnalǵan saltanatty rásimde Mınıstrler kabıneti tóraǵasynyń orynbasary — UQK tóraǵasy Qamchybek Tashıev eńbek mıgranttaryn elge qaıtarý qajettigin aıtty, dep habarlaıdy Kazinform agenttiginiń menshikti tilshisi.
Onyń aıtýynsha, qazir Naryn oblysynda jalpy somasy 15 mlrd som bolatyn 127 iri joba júzege asyrylyp jatyr.
— Bul qarajatty ıgerý jáne qurylysty aıaqtaý úshin tehnıka men jumys kúshi qajet. Bizdiń azamattar tabys tabý úshin shetelge ketip, ózge elde mıgrantqa aınalady. Olar elge oralýy tıis. Prezıdent óz sózderiniń birinde mıgranttardy elge qaıtaratynymyzdy aıtqan. Mine, ol ýaqyt keldi. Olar qurylys alańdarynda eńbek etip, arnaıy tehnıkany basqaryp, halyqqa qyzmet ete alady. Bizdiń azamattarǵa arnalǵan jumys óte kóp. Qazir jumys kúshi jetispeıdi, — dep atap ótti qaýipsizdik qyzmetiniń basshysy.
Qamchybek Tashıev sondaı-aq Naryn oblysynda eki beton zaýyty salynǵanyn, olardyń biriniń jumysy sapasyz betonǵa baılanysty toqtatylǵanyn aıtty.
— Materıal men shıkizat jetispeıdi. Bul uzaq ýaqyt boıy bolmaǵan qurylys kóleminiń artýynyń aıqyn belgisi, — dedi ol.
Qaýipsizdik qyzmetiniń basshysy Ózbekstan jáne Tájikstanmen shekarany delımıtatsııalaý aıaqtalǵannan keıin bılik ishki máselelerdi sheshýge kiriskenin erekshe atap ótti.
— Qyrǵyzstan shyn máninde egemen memleketke aınaldy. Biz bul týraly 30 jyl boıy aıtyp kelsek te, shekaramyz uzaq ýaqyt boıy ashyq boldy. Qaı jerdiń bizge, al qaısysynyń kórshilerge tıesili ekenin bilmedik. Endi árbir metr jer bekitilgen soń, iri ishki máselelerdi sheshýge kirisemiz. Qurylys jumystary tek Naryn oblysynda ǵana emes, búkil el boıynsha júrgizilip jatyr, — dedi ol.
Q.Tashıev qazan aıynda Narynǵa qaıta kelip, qurylys jumystarynyń sapasy men joldardyń jaǵdaıyn baǵalaıtynyn málimdedi.
Eske sala keteıik, 2025 jyldyń 1 qańtarynan bastap Qyrǵyzstanda sheteldik azamattar men azamattyǵy joq adamdardyń elde bolý jáne eńbek qyzmetin júzege asyrý úshin ruqsat qujattaryn rásimdeý tártibi jónindegi ýaqytsha ereje kúshine endi.