Qyrǵyzstan el táýelsizdiginiń 35 jyldyǵyn toılap jatyr
ASTANA. KAZINFORM — Qyrǵyzstan táýelsizdiginiń 35 jyldyǵyn atap ótip jatyr, dep habarlaıdy agenttiktiń Bishkektegi tilshisi.
Jyl saıyn 31 tamyzda el óziniń basty ulttyq merekesi — Táýelsizdik kúnin atap ótedi. 1991 jyly osy kúni Qyrǵyz Respýblıkasy Joǵarǵy Keńesiniń kezekten tys sessııasy keńestik respýblıkalardyń ishinde alǵashqylardyń biri bolyp «Qyrǵyz Respýblıkasynyń Memlekettik Táýelsizdigi týraly deklaratsııasyn» qabyldady. Bul tarıhı akt eldi táýelsiz, egemen jáne demokratııalyq memleket dep jarııalady.
Táýelsizdiktiń 35 jyldyǵyna arnalǵan merekelik sózinde Qyrǵyzstan prezıdenti Sadyr Japarov eldiń qazirgi jetistikterin aıtyp, negizgi tarıhı jáne halyqaralyq kezeńderdi eske aldy. Ol táýelsizdik ǵasyrlar boıy synaqtardan ótken ata-babalardyń baǵa jetpes murasy ekenin atap ótti.
Qyrǵyz kóshbasshysy ásirese memleket táýelsizdigi týraly deklaratsııany qabyldaǵan «ańyzǵa aınalǵan parlamenttiń» úlesin erekshe atady.
Onyń aıtýynsha, Qyrǵyzstan jańa ómirge qadam basyp, damýdyń jańa jolyn tańdady. Qyrǵyzstan halqy qonaqjaı, kópshil, al onyń ekonomıkasy únemi qarqyn alyp keledi. Ol sondaı-aq Qyrǵyzstan 100-den astam eldiń senimin aqtap, BUU Qaýipsizdik Keńesiniń ýaqytsha múshesi bolyp saılanýyndaǵy tabysyn atap ótti.
Táýelsizdik mereıtoıyn toılaý Shanhaı yntymaqtastyq uıymynyń 25 jyldyǵyna arnalǵan tarıhı sammıtpen jáne VI Dúnıejúzilik kóshpendiler oıyndarynyń resmı ashylýymen tuspa-tus keldi.
— Memlekettiń kúshi onyń azamattarynyń ıntellektýaldyq áleýeti men moraldyq tazalyǵynda. Biz tarıhı jolymyzdy jalǵastyryp, tamyrymyzdy saqtap, nyǵaıtyp, qaı salada jumys istesek te, joǵary mádenıet deńgeıin kórsetip, sol arqyly memleketimizdi nyǵaıtýymyz kerek. Biz muny árbir is-áreketimiz, adal eńbek, bilimge umtylý jáne birlik arqyly jasaýymyz kerek. Bizdiń basqa otanymyz joq. Qyrǵyzstan — bizdiń jalǵyz úmitimiz jáne máńgilik qutty mekenimiz! — delingen qyrǵyz kóshbasshysynyń quttyqtaý hatynda.
Aıta keteıik, 1 qyrkúıekte Qyrǵyzstan astanasynda Shanhaı yntymaqtastyq uıymyna múshe memleketter basshylary keńesiniń kezekti otyrysy ótedi.
Bir kún buryn Qytaı tóraǵasy Sı Tszınpın Qyrǵyzstanǵa memlekettik saparmen bardy.
Búgin jańa «Bishkek Arena» stadıonynda VI Dúnıejúzilik kóshpendiler oıyndarynyń saltanatty ashylý rásimi ótedi. Oıyndardyń negizgi mádenı jáne ǵylymı baǵdarlamasy 2-6 qyrkúıek aralyǵynda Sholpan-Ata men Ystyqkól oblysyndaǵy Qyrchyn shatqalynda jalǵasady.
Osyǵan deıin Toqaev Sadyr Japarovty Qyrǵyzstannyń Táýelsizdik kúnimen quttyqtaǵanyn jazǵanbyz.
