Qyrǵyzstan elge polıetılen paketterin kirgizýge ýaqytsha tyıym salmaqshy

ASTANA.KAZINFORM - Qyrǵyzstan elge polıetılen paketterin ákelýge ýaqytsha moratorıı engizýdi kózdep otyr, dep habarlaıdy Kazinform tilshisi.

Úkimettiń tıisti qaýlysy qoǵamdyq talqylaýǵa shyǵaryldy.

Qyrǵyz Respýblıkasy Ulttyq statıstıkalyq komıtetiniń málimeti boıynsha, 2024 jyly elde 707 tonnadan astam etılen polımerli qapshyq óndirildi, onyń 1,6 mıllıon tonnasy ımporttalady, bul kórsetkishtiń negizgi úlesi Qytaıǵa (1,4 mıllıon tonna) tıesili.

Bastamashylar polıetılen paketin paıdalanýdyń ortasha ýaqyty nebári birneshe mınýtty quraıtynyn, al onyń ydyraý kezeńi birneshe ǵasyrǵa sozylatynyn atap ótti. Bul tabıǵı ekojúıeni buzatyn jáne osyndaı aýmaqtardyń mańynda turatyn halyqtyń ómir súrý sapasyn nasharlatatyn polıgondar sanynyń kóbeıý qaýpin týdyrady.

Qalyńdyǵy 20 mkm jáne odan tómen polıetılendi qaptardy qaıta óńdeý resýrsty 3-4 ese kóp qajet etedi, sondyqtan olardy jınaý jáne qaıta óńdeý kezinde qıyndyqtar týyndaıdy. Tyıym salýdy engizý aýyrtpalyqty azaıtýǵa, halyqtyń densaýlyǵyn qorǵaýǵa jáne ekologııalyq taza balamalardyń damýyn yntalandyrýǵa kómektesýi múmkin.

Aıta keteıik, 2023 jyly elde 2027 jyldyń 1 qańtarynan bastap polıetılen plenkaly paketter men plastık buıymdardy ákelýge, óndirýge, satýǵa jáne tegin taratýǵa tyıym salýdy qarastyratyn zań qabyldanǵan bolatyn.