Qyrǵyzstan elektr qýatynyń úzilýine qatysty pikir bildirdi
ASTANA.KAZINFORM - «Qyrǵyzstannyń Ulttyq elektr jelisi» AAQ Bishkektiń keıbir aýdandary men eldiń basqa da birneshe qalasyndaǵy elektr qýatynyń úzilý sebebin anyqtady.
Uıym málimetinshe, 14 tamyz kúngi saǵat 15:34-tegi Qazaqstannyń elektr jelisindegi soltústik jáne ońtústik bólikterin jalǵaıtyn joǵary voltty jeliniń syrtqy úzilisinen Ortalyq Azııanyń Biryńǵaı energetıkalyq júıesi oqshaýlanǵan.
-Qyrǵyzstan Respýblıkasynyń elektr jelisi ýaqytsha oqshaýlanǵan jumys rejımine kóshti. Jabdyqtardy saqtaý úshin avtomatty basqarý júıesi erejelerge sáıkes jumys istedi. Jaǵdaı energetıkterdiń baqylaýynda. Elektr jelisiniń mamandary jumysty turaqtandyrý jáne qalypty elektr qýatymen qamtamasyz etý úshin qajetti sharalardy qabyldaıdy, - delingen málimdemede.
Qysqa merzimdi elektr qýatynyń úzilý sebebi týraly qosymsha aqparat beriletin bolady.
Buǵan deıin Tájikstan men Qyrǵyzstan aýdandary jappaı jaryqsyz qalǵany habarlanǵan bolatyn.
