Qyrǵyzstan elektr energııasyn qashan eksporttaı bastaıdy
ASTANA. KAZINFORM — Qyrǵyzstannyń Jalal-Abad oblysy Toǵyz-Toro aýdanynda «Qazarman GES-teri» kaskadynyń qurylysy bastaldy. Saltanatty kapsýla salý rásimine el prezıdenti Sadyr Japarov qatysty, dep habarlaıdy Kazinform agenttiginiń menshikti tilshisi.
Prezıdenttiń aıtýynsha, «Qazarman GES-teri» kaskady táýelsizdik jyldaryndaǵy eń iri energetıkalyq jobalardyń birine aınalady.
Joba aıasynda jalpy belgilengen qýaty 912 megavatt bolatyn úsh sý elektr stantsııasy salynady. Kaskad jylyna 3,75 mlrd kılovatt-saǵattan astam elektr energııasyn óndiredi. Jobanyń jalpy quny 3 mlrd AQSh dollaryna baǵalanyp otyr. Qurylysty tolyq aıaqtaý 2031 jylǵa josparlanǵan.
Sadyr Japarov qazirgi elektr energııasy tapshylyǵy el ekonomıkasynyń qarqyndy ósýimen baılanysty ekenin aıtty.
– Sońǵy úsh jylda elimizde jyl saıyn júzdegen jańa zaýyt, fabrıka jáne áleýmettik nysan iske qosylyp jatyr. Sonyń saldarynan elektr energııasyn tutyný jańa óndiristik qýattardy iske qosý qarqynynan asyp tústi, – dedi ol.
Qyrǵyzstan basshysy «Qazarman GES-teri» kaskady men Qambar-Ata GES-1 paıdalanýǵa berilgennen keıin el óziniń elektr energııasyna degen ishki qajettiligin tolyq qamtamasyz etip qana qoımaı, kórshi memleketterge elektr energııasyn eksporttaıtyn elge aınalatynyn málimdedi.
Eske sala keteıik, Qyrǵyzstanda 2023 jylǵy 1 tamyzdan 2026 jylǵy 31 jeltoqsanǵa deıin energetıka salasynda tótenshe jaǵdaı rejımi engizilgen. Sondyqtan eldiń elektr energııasyn eksporttaý múmkindigi jańa iri gıdroenergetıkalyq jobalar aıaqtalǵannan keıin, ıaǵnı 2031 jyldan keıin kútiledi.
Aıta ketelik Qytaı Qyrǵyzstannyń «jasyl» energetıkasyna 1 mlrd dollarǵa deıin ınvestıtsııa salýǵa daıyn.
