Qyrǵyzstan ekonomıkasy jeti aıda 11,1%-ǵa ósti
ASTANA. KAZINFORM – Qyrǵyzstannyń ishki jalpy ónimi (ІJÓ) bıyl qańtar-shilde aılarynda, aldyn ala baǵalaý boıynsha, 1 trln 172,7 mlrd somdy (shamamen 13,4 mlrd AQSh dollary) qurady. Bul byltyrǵy sáıkes kezeńmen salystyrǵanda 11,1%-ǵa joǵary. Bul týraly Qyrǵyzstan Ulttyq statıstıka komıteti habarlady.
Komıtettiń málimetinshe, ekonomıkalyq ósimge qyzmet kórsetý salasy, taýar óndirý salalary jáne ónimderge salynatyn taza salyqtar úles qosqan.
ІJÓ qurylymynda qyzmet kórsetý salasynyń úlesi 49,8%, taýar óndirý salalarynyń úlesi 34,2%, al ónimderge salynatyn taza salyqtardyń úlesi 16% boldy.
Esepti kezeńde ónerkásip óndirisiniń kólemi 11,2%-ǵa artty. Qurylys salasyndaǵy ósim 1,6 eseni, kóterme jáne bólshek saýdada 4%-dy qurady.
Aýyl, orman jáne balyq sharýashylyǵyndaǵy kórsetkish 6%-ǵa, qonaqúıler men meıramhanalar qyzmetiniń kólemi 9,3%-ǵa ósti.
Bıyl qańtar-maýsym aılarynda Qyrǵyzstannyń syrtqy jáne ózara taýar saýdasynyń kólemi 7,9 mlrd dollardy qurap, byltyrǵy sáıkes kezeńmen salystyrǵanda 1,4%-ǵa artty.
Saýda kóleminiń ósýine ımporttyń 3,7%-ǵa artýy áser etti. Al eksport, kerisinshe, 11,1%-ǵa tómendedi.
Eldiń jalpy taýar aınalymynda eksporttyń úlesi 13,5%, ımporttyń úlesi 86,5% boldy.
Eske sala ketsek, Qazaqstan men Qyrǵyzstan arasyndaǵy AÓK ónimderiniń taýar aınalymy 41,5%-ǵa ósti.
