Qyrǵyzstan birjynysty nekege tyıym salmaqshy

ASTANA. KAZINFORM — Qyrǵyzstannyń Eńbek, áleýmettik qamsyzdandyrý jáne kóshi-qon mınıstrligi bir jynysty nekege tyıym salatyn otbasy kodeksiniń jańa redaktsııasyn ázirledi. Qujat qoǵamdyq talqylaýǵa shyǵaryldy. 

«Jańa jobada neke jasyn bir jylǵa tómendetý normasy alynyp tastaldy, nekege 18 jastan bastap ruqsat etiledi. Túzetýlerge sáıkes, neke tek er men áıel arasynda ǵana jasalýy múmkin. Bul rette neke qııýdy memlekettik tirkeýsiz dinı neke qııýǵa tyıym salynady. Osy normany buzǵany úshin zańnamada belgilengen tártippen jaýapkershilik kózdelgen», - delingen habarlamada. 

Sonymen qatar, jazasyn ótep jatqan sottalǵandar, jetinshi urpaqty qosa alǵanda tikeleı týystary, aǵa-inileri, apa-sińlileri, onyń ishinde ortaq ákesi nemese sheshesi, sondaı-aq asyrap alýshysy men asyrap alǵan balasy, qorǵanshysy bar adamdardyń nekege turýyna jol berilmeıdi.

Balalardy otbasyna ornalastyrý, qorǵanshy (qamqorshy) taǵaıyndaý jáne balalardy Qyrǵyz Respýblıkasynyń azamattaryna asyrap alýǵa berý fýnktsııalary jergilikti memlekettik basqarýǵa beriledi. Balalarǵa alıment tóleý jónindegi mindetter týraly baptar ońtaılandyryldy, ata-ananyń balany kútý men tárbıeleýdegi jaýapkershiligi kúsheıtildi. Memlekettik qorǵaýdy qajet etetin balalardy esepke alý avtomattandyrylǵan aqparattyq júıe arqyly júzege asyrylatyn bolady, - dep jazylǵan qujatta. 

Qujattyń jańa redaktsııasyndaǵy mindetter — otbasy ınstıtýtyn damytý, dástúrli otbasy qundylyqtaryn saqtaý, qoǵamdaǵy otbasy rólin arttyrý.