Qyrǵyzstan bıligi jasóspirimderdiń kvadrobıngke degen qumarlyǵyna alańdaýly

ASTANA. KAZINFORM — Jogorký Kenesh otyrysynda óskeleń urpaq arasynda kvadrobıng qozǵalysynyń taralý máselesi kóterildi, dep habarlaıdy Kazinform tilshisi.

Depýtat Dastan Bekeshev mınıstrler kabınetiniń Parlamenttegi ókili Almasbek Abytovtyń nazaryn jasóspirimder arasynda keń taraǵan kvadrobıng úrdisine aýdaryp, Bilim jáne ǵylym mınıstrligine eldiń barlyq mektepterinde túsindirý sharalaryn uıymdastyrý týraly usynys jasady. 

«Mektepterdegi keıbir oqýshylar kvadrobıngpen aınalysyp, janýarlarǵa elikteıdi. Qazirgi ýaqytta bul elde onsha úlken másele emes, biraq sonymen birge sharalar qabyldaý qajet», — dep alańdaýshylyq bildirdi parlamentarıı.

Kvadrobıng — balalar men jasóspirimderdiń janýarlar qımylyna eliktep, tórt aıaqpen qozǵalatyn áreket túri. Olar túlki, qasqyr jáne t. b. janýarlardy beıneleý úshin betperdeler men jalǵan quıryqtardy paıdalanady.

Buǵan deıin Ózbekstanda kvadroberlerdiń ata-analaryna aıyppul týraly eskertildi.