Qyrǵyzstan bıligi Tergeý komıtetin qurýdy josparlap otyr

ASTANA. KAZINFORM – Qyrǵyz Respýblıkasynyń Prezıdenti Sadyr Japarov kúshtik qurylymdardy aýqymdy reformalaýǵa daıyndalyp jatqanyn málimdedi. 

Prezıdenttiń aıtýynsha, reforma kelesi jyly iske asyrylady. Onyń aıasynda Qyrǵyzstannyń Ulttyq qaýipsizdik memlekettik komıteti óz qyzmetin tek beıindik baǵyttarǵa – barlaý jáne qarsy barlaý jumystaryna, konstıtýtsııalyq qurylysty qorǵaýǵa, terrorızmge, ekstremızmge, bandıtızmge jáne esirtkiniń zańsyz aınalymyna qarsy kúreske shoǵyrlandyrady.

– Vedomstvo tergeý júrgizý quqyǵyn dál osy baǵyttar boıynsha ǵana saqtaıdy. Ekonomıkaǵa aralaspaıdy. Ulttyq qaýipsizdik komıtetiniń naqty nemen aınalysatynyn jáne onyń qyzmetkerleriniń kim ekenin eshkim bilmeýi tıis, – dedi Sadyr Japarov «Kabar» agenttigine bergen suhbatynda.

Prezıdenttiń sózinshe, Іshki ister mınıstrligi óz quzyreti sheginde qyzmetin jalǵastyryp, beıindik baǵyttar boıynsha tergeý júrgizý quqyǵyn saqtaıdy. Barlyq kúshtik organdardyń ókilettigi zańnamalyq turǵyda naqty aıqyndalmaq.

Reformanyń negizgi bóligi – jańa Tergeý komıtetin qurý. Oǵan negizgi tergeý fýnktsııalary beriledi. Al Bas prokýratýra men Áskerı prokýratýra barlyq qurylymdardyń áreketteriniń zańdylyǵyna qadaǵalaý júrgizedi.

– Qazirgi tańda ádiletsizdik faktileri bar ekenin joqqa shyǵarýǵa bolmaıdy. Tergeý komıteti tikeleı Prezıdentke baǵynady. Ol jedel qyzmetkerler nemese mınıstrler usynǵan tolyq pysyqtalmaǵan ne qoldan jasalǵan isterdi qabyldamaıdy. Negizsiz qylmystyq ister qozǵalmaıdy. Ádiletsizdikke tap bolǵan azamattar qamaýǵa alynbaıdy, dereý bosatylady. Osylaısha biz adam quqyqtarynyń saqtalýyn keminde 95 paıyz deńgeıinde qamtamasyz ete alamyz. Bul bolashaq urpaqtyń qaýipsizdigine kepil bolady, – dedi Japarov.

Onyń aıtýynsha, dál osyndaı tásil ekonomıkalyq qylmystarǵa qatysty da qoldanylady.

– Eger shyn máninde qylmys jasaǵan bolsań, jaýapqa tartylasyń, al jala jabylǵan bolsa, bostandyqqa shyǵasyń. Bir-birine baǵynbaıtyn eki organ bolǵan jaǵdaıda durys ári obektıvti sheshimder qabyldanady, – dedi Qyrǵyzstan basshysy.

Prezıdent reformanyń uzaqmerzimdi perspektıvaǵa baǵyttalǵanyn atap ótti. Qajetti ınfraqurylym ázirlenip, tehnıkalyq baza qalyptastyrylady, tıisti jarlyq shyǵarylady, zań jobalary parlament – Jogorký Keneshtiń qaraýyna engiziledi.

Sadyr Japarov bıyl Qyrǵyzstan Shanhaı yntymaqtastyq uıymynyń sammıtin jáne Dúnıejúzilik kóshpendiler oıyndaryn qabyldaıtynyn eske saldy. Sondyqtan reformany iske asyrý osy is-sharalardan keıin, kelesi jyly bastalady.

Eske salaıyq, Qyrǵyzstannyń Ulttyq qaýipsizdik memlekettik komıtetine jańa basshy taǵaıyndaldy.