Qyrǵyzstan bıligi «Manas» áýejaıyndaǵy apatqa qatysty túsinik berdi
ASTANA. KAZINFORM — Bishkek-Osh reısin oryndaǵan ushaq «Manas» halyqaralyq áýejaıynda tótenshe jaǵdaıǵa tap boldy, dep habarlaıdy Kazinform agenttiginiń Bishkektegi tilshisi.
«Qyrǵyzstan áýejaılary» AAQ málimeti boıynsha, 2026 jyldyń 7 shildesinde Bishkek-Osh reısine ushar aldynda TezJet áýe kompanııasyna tıesili McDonnell Douglas MD-83 ushaǵynyń artqy shassıi isten shyqqan.
— Saldarynan ushaq solǵa qaraı eńkeıip, sol qanaty ushý-qoný jolaǵyna soǵylyp, toqtady. Barlyq qajetti sharalar dereý qabyldandy. Zardap shekkender joq. Qyrǵyzstannyń Azamattyq avıatsııa memlekettik agenttigi bul oqıǵa boıynsha resmı tergeý bastady, — delingen habarlamada.
Ushaq ushý-qoný jolaǵynan evakýatsııalandy, tógilgen reaktıvti otyndy tazartý jumystary júrgizildi. «Manas» halyqaralyq áýejaıy saǵat 9:00–de jumysyn qaıta bastady.
Qajetti tekserýler aıaqtalǵanǵa deıin TezJet ushaqtarynyń jumysyn ýaqytsha toqtatý týraly sheshim qabyldandy.
Esterińizge sala keteıik, bir kún buryn Bishkek áýejaıynda 181 jolaýshy men alty ekıpaj múshesi bar ushaq apatqa ushyraǵan bolatyn.
