Qyrǵyzstan bıligi kredıttik tarıhty saqtaý merzimin qysqartpaq
ASTANA. KAZINFORM — Jeke tulǵalar men kásipkerler úshin nesıelerdiń qoljetimdiligin arttyrý maqsatynda el bıligi kredıttik aqparatty saqtaý merzimin qysqartýdy usynyp otyr, dep habarlaıdy Kazinform agenttiginiń menshikti tilshisi.
Jogorký Keneshtiń Qarjy, bıýdjet, kásipkerlik jáne básekelestikti damytý jónindegi komıteti kredıttik aqparat almasý týraly zań jobasyn birinshi oqylymda maquldady.
Zań jobasyna sáıkes, teris (negatıvti) kredıttik tarıhty saqtaý merzimi bes jyldan úsh jylǵa deıin, oń (pozıtıvti) kredıttik aqparatty saqtaý merzimi jeti jyldan bes jylǵa deıin qysqartylady. Al 10 myń somǵa deıingi mıkronesıeler boıynsha aqparatty saqtaý merzimi bir jylǵa deıin belgilenedi.
Qujatty qabyldaý mynalarǵa múmkindik beredi:
«kredıttik qara tizimde» turǵan shamamen 200 myń qoldanystaǵy qaryz alýshy úshin anaǵurlym qolaıly jaǵdaı jasaýǵa;
jeke tulǵalar men shaǵyn jáne orta kásipkerlik sýbektileri úshin nesıelerdiń qoljetimdiligin arttyrýǵa;
shaǵyn jáne orta bıznestiń damýyn yntalandyrýǵa;
kóleńkeli nesıelendirý deńgeıin tómendetýge jáne resmı qarjy júıesinen tys mıkronesıeler sanynyń ósýin azaıtýǵa.
Aıta ketelik Qyrǵyzstan blogerlerdi salyq tóleýge mindettemek.