Qyrǵyzstan bıligi azamattaryn elektr energııasyn únemdeýge shaqyrdy

ASTANA. KAZINFORM – Qyrǵyzstan energetıka mınıstri Taalaıbek Ibraev aldaǵy qystyń asa kúrdeli bolatynyn eskertip, halyqty elektr energııasyn únemdeýge shaqyrdy, dep habarlaıdy «Kabar».

Mınıstrdiń aıtýynsha, qazirgi tańda Toktogúl sý qoımasyndaǵy sý kólemi byltyrǵy kórsetkishten 1,6 mlrd tekshe metrge tómen.

«Bul degenimiz – elektr energııasy 1,6 mlrd kVt/saǵatqa az óndiriledi degen sóz. 2024 jyly sý deńgeıi 12,4 mlrd tekshe metr bolǵanda, energetıkter qysqy maýsymdy asa iri qıyndyqsyz ótkerdi, apatty sóndirýler az boldy. Biraq bul tabıǵattyń zańdylyǵy. Mysaly, ótken jyly jaýyn-shashyn mólsheri 107% bolsa, bıyl – 92%. Sý tapshylyǵy tek Qyrǵyzstanda ǵana emes, Tájikstan, Ózbekstan jáne Qazaqstanda da sezilýde», – dedi ol.

Ibraev sýdyń tapshylyǵy týraly alǵash ret 2021 jyly aıtqanyn eske saldy. Onyń aıtýynsha, sý deńgeıi Toktogýl ǵana emes, Orto-Tokoı, Kırov sý qoımalarynda da tómendegen.

Qazirgi tańda Qyrǵyzstan tutynatyn elektr energııasy óndirilgen kólemnen artyq. Tapshylyqty el kórshi memleketterden ımport arqyly jaýyp otyr.

Mınıstr turǵyndarǵa elektr energııasyn únemdeýdi, tutyný tártibin saqtaýdy, ásirese júkteme eń joǵary ýaqyttarda qýaty kóp quraldardy qoldanbaýdy eskertti.

Eske salsaq, 2023 jylǵy 1 tamyzdan bastap 2026 jylǵy 31 jeltoqsanǵa deıin Qyrǵyzstanda energetıka salasynda tótenshe jaǵdaı rejımi engizilgen bolatyn.

Mınıstrdiń boljamynsha, el 2028 jylǵa qaraı qosymsha qýat kózderin iske qosý arqyly energetıkalyq daǵdarystan shyǵa alady.

Aıta keteıik, Qyrǵyzstanda qara metall synyǵy men qaldyqtaryn eksporttaýǵa tyıym salyndy.