Qyrǵyzstan bıligi aldaǵy 10 jylda eldiń syrtqy qaryzynan tolyq qutylýǵa nıetti

BІShKEK. KAZINFORM – Qyrǵyzstannyń syrtqy qaryzy 4,5 mlrd dollar shamasynda saqtalyp otyr, dep habarlaıdy Kazinform agenttiginiń tilshisi.

«Kabar» agenttigine suhbat bergen Qyrǵyzstan prezıdenti Sadyr Japarov eldiń syrtqy qaryzy 7 mlrd dollardan asty degen aqparatqa qatysty pikir bildirdi.

- Bul – jalǵan aqparat. Bizdiń syrtqy qaryzymyz 4,5 mlrd dollar shamasynda. Mundaı derekterdi jasyrynyp júrgen saıasatkerler bılikti jamandaý maqsatynda taratyp otyr. Qazir syrtqy qaryzǵa qatysty eshqandaı qorqynysh joq, - dedi Sadyr Jarapov.

Onyń aıtýynsha, Qyrǵyzstan ekonomıkasy syrtqy qaryzdy merziminen buryn jabýǵa qaýqarly. Degenmen nesıeni erte óteý memleket úshin tıimsiz.

- Depýtattar usynǵandaı, syrtqy qaryzdy bir kúnde jaýyp tastaýǵa bolady. Alaıda, bulaı óteý tıimsiz. Sebebi nesıeler 2 paıyzben 30-40 jyl merzimge alyndy. Kelisimge saı, eger biz ony erte tólesek, paıyzdyq ústemeaqy 2 paıyzdan joǵary shyǵady. Keste boıynsha eldiń negizgi syrtqy qaryzyn 2035 jylǵa qaraı tolyq ótep bolamyz. Sondyqtan bul biz úshin másele emes, - dedi Qyrǵyzstan prezıdenti.

Qosa ketsek, Qyrǵyzstanda 3 mlrd dollarǵa «Maqmal-Qarakól» baǵyty boıynsha temirjol salynady.

Sonymen qatar, Azııa damý banki Qyrǵyzstanǵa memlekettik ınvestıtsııalyq jobalar men baǵdarlamalardy qarjylandyrý úshin 74,8 mln dollar grant jáne 147,2 mln dollar jeńildik nesıe beredi.