Qyrǵyzstan bank sektorynyń jıyntyq aktıvteri jyl basynan beri 28,6 paıyzǵa ósti
ASTANA. KAZINFORM – 2026 jylǵy 30 sáýirdegi jaǵdaı boıynsha Qyrǵyzstan bank sektorynyń jıyntyq aktıvteri jyl basynan beri 28,6 paıyzǵa ósip, 1 558,1 mlrd somdy qurady. Bul shamamen 17,81 mlrd AQSh dollaryna teń, dep habarlaıdy Qyrǵyzstan Ulttyq banki.
Ulttyq bank dereginshe, 2025 jyldyń sońynda bank sektorynyń jıyntyq aktıvteri 1 211,2 mlrd som bolǵan.
Sonymen qatar bank sektory klıentteriniń nesıe portfeli 569,8 mlrd somǵa jetti. Bul jyl basynan beri 12,4 paıyzǵa kóp. 2025 jyldyń sońynda bul kórsetkish 507,0 mlrd somdy quraǵan.
Bank júıesindegi jiktelgen kredıtterdiń úlesi jalpy nesıe portfeliniń 11,2 paıyzyna nemese 64,0 mlrd somǵa teń boldy. 2025 jyldyń sońynda bul kórsetkish 10,5 paıyz nemese 53,0 mlrd som bolǵan.
Merzimi ótken kredıtter kólemi 10,5 mlrd somdy nemese bank júıesi nesıe portfeliniń 1,8 paıyzyn qurady. Jyl basynan beri bul kórsetkish 1,8 mlrd somǵa nemese 20,2 paıyzǵa ulǵaıǵan.
Bank sektorynyń jıyntyq mindettemeleri jyl basynan beri 28,5 paıyzǵa ósip, 1 273,3 mlrd somǵa jetti. 2025 jyldyń sońynda bul kórsetkish 990,6 mlrd som bolǵan.
Bank sektory klıentteriniń jalpy depozıttik bazasy 924,1 mlrd somdy qurady. Jyl basynan beri depozıt kólemi 6,7 paıyzǵa artqan. 2025 jyldyń sońynda depozıttik baza 866,2 mlrd som bolǵan.
Ulttyq bank belgilegen ekonomıkalyq normatıvterdi esepteý úshin qoldanylatyn bank sektorynyń taza jıyntyq kapıtaly 279,2 mlrd somdy qurap, jyl basynan beri 29,2 paıyzǵa ósti. 2025 jyldyń sońynda bul kórsetkish 216,1 mlrd som bolǵan.
Bank sektory kapıtalyndaǵy sheteldik qatysý úlesi 13,2 paıyzdy nemese 31,2 mlrd somdy qurady. 2025 jyldyń sońynda bul kórsetkish 16,5 paıyz nemese 26,6 mlrd som bolǵan.
Aıta keteıik, Qyrǵyzstan men Ózbekstan taýar aınalymyn 2 mlrd dollarǵa deıin arttyrýdy kózdep otyr.
