Qyrǵyzstan balalarǵa energetıkalyq sýsyn satqandarǵa $600 aıyppul salmaq
ASTANA. KAZINFORM — Qyrǵyzstanda 18 jasqa tolmaǵandarǵa energetıkalyq sýsyn satqandarǵa qomaqty aıyppul salatyn zań jobasy talqylanyp jatyr.
Zań jobasy qoǵamdyq talqylaýǵa usynylǵan.
Qujatqa sáıkes, balalarǵa energetıkalyq sýsyndar satýǵa tyıym salý barlyq taratý arnalaryn qamtıdy. Atap aıtqanda, dúkenderdegi, sýpermarkettegi, kafedegi, bardaǵy, fýdkorttardaǵy bólshek saýda, onlaın satý, tamaq jetkizý qyzmetteri jáne kýrerlik qyzmet arqyly satýǵa tyıym salynǵan. Al saýda avtomattary arqyly satýǵa tolyǵymen tyıym salynady, sebebi olar satyp alýshynyń jasyn rastaı almaıdy.
Satýshylar men kýrerler satyp alýshynyń jasyna kúmándanǵan jaǵdaıda jeke basyn kýálandyratyn qujattardy suraýy kerek.
Usynylyp otyrǵan aıyppuldar mólsheri:
- Kámeletke tolmaǵandarǵa satqany úshin jeke tulǵalarǵa 10 000 som (51 500 teńge) jáne zańdy tulǵalarǵa 35 000 som (180 000 teńge);
- Bir jyl ishinde qaıtalansa, 20 000 som (103 000 teńge) jáne 55 000 som (283 000 teńgeden astam);
- Energetıkalyq sýsyndardy saýda avtomattary arqyly satqany úshin jeke tulǵalarǵa 10 000 som (51 500 teńge) jáne zańdy tulǵalarǵa 35 000 som (180 000 teńge).
Sondaı-aq, 18 jasqa tolmaǵan balalarǵa energetıkalyq sýsyn satýǵa tyıym salynǵany týraly eskertpeler ilinbegen dúkenderge eskertý jasalady nemese jeke tulǵalarǵa 1 000 som (5 000 teńgeden astam) jáne zańdy tulǵalarǵa 5 000 som (25 000 teńgeden astam) aıyppul salynady.
Buǵan deıin Qyrǵyzstan prezıdenti Sadyr Japarov úkimetke bir aı ishinde energetıkalyq sýsyndardy óndirý men ımporttaýǵa tyıym salýdy qarastyrýdy tapsyrǵan edi.
