Qyrǵyzstan Ázerbaıjannan munaı ımporttaıdy
ASTANA. KAZINFORM – Qyrǵyzstannyń Energetıka mınıstrligi Ázerbaıjan tarapyn osy elge shıki munaı jetkizý jáne óńdeý týraly kelisimge qol qoıýǵa shaqyrdy.
Qyrǵyzstan Energetıka mınıstrliginiń habarlaýynsha, bul másele Ázerbaıjan men Qyrǵyzstannyń tıisti vedomstvolarynyń basshylary Parvız Shahbazov pen Taalaıbek Ibraev arasynda Bishkekte Túrki memleketteri uıymynyń 4-shi otyrysy aıasynda ótken kezdesýde talqylandy.
Kezdesý barysynda Taalaıbek Ibraev Ázerbaıjannyń munaı ken oryndaryn ıgerý jáne munaı ónimderin óndirý salasyndaǵy tájirıbesiniń joǵarylyǵyna toqtaldy. Osyny eskere otyryp, mınıstr Qyrǵyzstanǵa shıki munaı jetkizý jáne óńdeý boıynsha uzaq merzimdi kelisimshartqa qol qoıýdy, jańartylatyn energııa kózderi (JEK) salasyndaǵy gıdroenergetıkalyq jobalarǵa qatysýdy usyndy.
Qyrǵyz tarapy Qyrǵyzstanda elektromobılder úshin zarıadtaǵyshtardy satyp alý jáne ornatý úshin bastapqy kezeńde Ázerbaıjan-Qyrǵyz damý qorynan 2 mıllıon dollar kóleminde jeńildikti qarjylandyrý máselesin qarastyrýdy usyndy.
Parvız Shahbazov óz kezeginde yntymaqtastyqqa daıyn ekenin aıta kele, munaı jetkizý máselelerin talqylaý úshin arnaıy jumys tobyn qurýdy usyndy. Sonymen qatar, ol qyrǵyz áriptesterin jaqyn arada Ázerbaıjanda ótetin jańartylatyn energııa kózderi jónindegi ınvestıtsııalyq forýmǵa shaqyryp, Qyrǵyzstandy osy sharaǵa belsendi qatysýǵa shaqyrdy.
Buǵan deıin, 24 sáýirde Qyrǵyz Respýblıkasy men Ázerbaıjan Respýblıkasynyń Energetıka mınıstrlikteri munaı ken oryndaryn birlesip zertteý men ıgerýge, munaı jáne munaı saýdasyn damytýǵa baǵyttalǵan energetıka salasyndaǵy yntymaqtastyq týraly ózara túsinistik týraly memorandýmǵa qol qoıdy.
Buǵan deıin Ázerbaıjannyń Qazaqstannyń munaı sektoryna ınvestıtsııa salýǵa daıyn ekenin habarlaǵan bolatynbyz.
